सध्या सणासुदीच्या काळाला सुरुवात झाली असतानाच ग्राहकांना मोठा झटका बसला आहे. साखरेच्या दरात मोठी वाढ झालीय. गेल्या 18 दिवसात साखरेच्या दरात तब्बल 18 रुपयांची वाढ झाली आहे. या सणासुदीच्या काळात मोठ्या प्रमाणात मिठाईची खरेदी विक्री होत असते.परंतु साखरेच्या वाढत्या दरामुळं मिठाईच्या किंमतीमध्ये देखील वाढ होण्याची शक्यता वर्तवण्यात येत आहे.

साखरेचा भाव 61 रुपये प्रति किलोवर

मध्य प्रदेशात साखरेच्या दरात (Sugar Prices ) मोठी वाढ होतेय. अवघ्या 18 दिवसांत साखरेचा भाव जवळपास 18 रुपये प्रति किलोने वाढलाय. भोपाळच्या घाऊक बाजारात साखरेचा भाव 61 रुपये प्रति किलोवर पोहोचलाय. व्यापाऱ्यांच्या मते, साखरेच्या दरात इतकी मोठी वाढ याआधी कधीही झालेली नाही.

साखरेच्या दरात वाढ का होतेय?

व्यापाऱ्यांच्या मते, साखरेच्या वाढत्या किमतींचे एक प्रमुख कारण म्हणजे सरकारचे साठा धोरण आहे. केंद्र सरकारने सध्या साखरेच्या साठ्यावर खूप मोठी मर्यादा घातलीय. व्यापाऱ्यांच्या मते, जर ही साठा मर्यादा कमी केली, तर बाजारात उपलब्धता वाढू शकते. तसेच किमतीही काही प्रमाणात नियंत्रणात ठेवता येऊ शकतात.

इथेनॉल उत्पादनाचाही परिणाम

देशातील अनेक साखर कारखान्यांनी इथेनॉलचे उत्पादन वाढवण्यावर भर दिलाय. इथेनॉल उत्पादनासाठी उसाचा वाढल्याने साखरेच्या दरात वाढ झाल्याचं म्हटलं जातंय. साखरेऐवजी इथेनॉल उत्पादनासाठी उसाचा काही भाग वापरला जात असल्याने साखर उत्पादनावर परिणाम झालाय. बाजारातील मागणीच्या तुलनेत पुरवठा कमी झाल्याने त्याचा थेट परिणाम किमतींवर होतोय.

सणासुदीचा हंगाम सुरु होणार आहे. अशा परिस्थितीत, साखरेच्या वाढत्या किमतींचा परिणाम मिठाई आणि इतर खाद्यपदार्थांवरही होऊ शकतो. व्यापाऱ्यांच्या मते, जर ही दरवाढ अशीच सुरु राहिली, तर येत्या काही दिवसांत साखर आणखी महाग होऊ शकते.