Pahalgam Terror Attack : पहलगाम दहशतवादी हल्यानंतर भारतात पाकिस्तानचे अनेक लोक चर्चेत आले आहेत. भारतात राहणाऱ्या पाकिस्तानी लोकांना स्वगृही जाण्याची इच्छा नाही. त्यातील एक डबाया राम. डबाया राम यांची गोष्ट फार वेगळी आहे. डबाया राम हे पाकिस्तानचे खासदार होते. सध्या ते भारतात कुल्फीची विक्री करून उदारनिर्वाह करत आहे. डबाया राम यांच्या कहाणीने सर्व चकीत झाले आहेत.

पाकिस्तानचे माजी खासदार डबाया राम हे भारताच्या हरियाणात कुल्फी आणि आइस्क्रीम विकून उदारनिर्वाह करत आहेत. पाकिस्तानच्या बेनजीर भुट्टो यांच्या सरकारमध्ये खासदारकी भूषवलेले डबाया राम हे कुटुंबासोबत २००० साली भारतात आले. मागील २५ वर्षांपासून भारतात असलेल्या डबाया राम यांना भारतीय नागरिकत्वाची आशा आहे. पहलगामधील दहशतवादी हल्ल्यानंतर अनेक लोकांचं आयुष्य चर्चेत आलं आहे.

पाकिस्तान ते भारतापर्यंतचा प्रवास

डबाया राम यांनी सांगितलं की, 'पाकिस्तानात हिंदूंची स्थिती बिकट आहे. ते सुरुवातीला एका महिन्यांच्या व्हिसा घेऊन भारतात आले होते. त्यानंतर वेळेनुसार व्हिसा वाढवून घेतला. सुरुवातीला एक वर्ष, पुढे पुन्हा एक वर्ष आणि त्यानंतर ५ वर्षांसाठी व्हिसा वाढवला. डबाया राम यांच्या घरात ३४ सदस्य आहेत. त्यातील ६ जणांना भारताचं नागरिकत्व मिळालं आहे. तर २८ जणांनी भारताचं नागरिकत्व मिळण्यासाठी अर्ज केले आहेत. अनेक जण अर्ज स्वीकारण्याची वाट पाहत आहेत.

मीडिया रिपोर्टनुसार, माजी खासदार डबाया राम आणि त्यांच्या कुटुंबीयांना दहशतवाद्यांच्या हल्ल्याचा निषेध केला. सरकारने दहशतवाद्यांवर कडक कारवाई केली पाहिजे, असे डबाया राम यांच्या कुटुंबीयांचं म्हणणं आहे. आता दहशतवाद्यांना घरात घुसून मारण्याची वेळ आली आहे, असंही त्यांचं म्हणणं आहे. डबाया राम हे हरियाणातील फतेहाबादमध्ये कुल्फी आणि आईस्क्रिम विक्री करण्याचे काम करत आहेत. स्थानिकांच्या सहकार्यामुळे त्यांचं कुटुंब शांततेत राहत असल्याचा त्यांचा दावा आहे.