Summary -

• ओडिशातील सरकारी सेवाश्रम शाळेत वर्गमित्रांनी झोपलेल्या विद्यार्थ्यांच्या डोळ्यात फेव्हिकॉल टाकल्याने गंभीर घटना घडली.

• ८ विद्यार्थ्यांचे डोळे चिकटले आणि त्यांना तात्काळ रुग्णालयात उपचारासाठी नेण्यात आले.

• प्रशासनाने मुख्याध्यापकाला निलंबित करून उच्चस्तरीय चौकशी सुरू केली.

• मुलांच्या सुरक्षिततेसाठी कडक उपाययोजना आणि जागरूकतेवर भर देण्यात येत आहे.

ओडिशातून एक भयंकर घटना समोर आली आहे. झोपलेल्या विद्यार्थ्यांच्या डोळ्यामध्ये फेव्हिकॉल टाकण्यात आले. यामुळे ८ विद्यार्थ्यांचे डोळे चिकटले. ही घटना कंधमाल जिल्ह्यातील सालागुड गावात असलेल्या एका सेवाश्रम शाळेमध्ये घडली. ही शाळा सरकारी असून त्यामुळे आदिवासी आणि दुर्गम भागामधील मुलं शिक्षण घेतात. हे विद्यार्थी वसतिगृहामध्ये राहतात. शुक्रवारी रात्री हे सर्व विद्यार्थी झोपले होते. त्यावेळी अचानक त्यांच्या डोळ्यामध्ये फेव्हिकॉल टाकण्यात आले. या घटनेमुळे शाळेत खळबळ उडाली.

मिळालेल्या माहितीनुसार, सेवाश्रम शाळेमध्ये शिकणाऱ्या ८ विद्यार्थ्यांच्या डोळ्यामध्ये फेव्हिकॉल टाकण्यात आला. हे विद्यार्थी रात्री झोपले होते. त्यावेळी त्यांच्याच काही वर्गमित्रांनी हे धक्कादायक कृत्य केले. फेव्हिकॉलमुळे या विद्यार्थ्यांच्या पापण्या चिकटल्या आणि सकाळी डोळे उघड नसल्यामुळे ते प्रचंड घाबरले. डोळे का उघड नाहीत त्यामुळे ते जोरजोरात ओरडू लागले. काही विद्यार्थी रडू लागले. त्यांच्या रडण्याचा आणि ओरडण्याचा आवाज ऐकून इतर विद्यार्थी आणि वॉर्डन जागे झाले आणि त्यांनी विद्यार्थ्यांच्या खोलीकडे धाव घेतली.

आठही मुलांना ताबडतोब गोछापाडा रुग्णालयात नेण्यात आले. तेथे प्राथमिक उपचार करण्यात आले. पण त्यांची प्रकृती गंभीर असल्यामुळे आठही मुलांना फुलबनी जिल्हा मुख्यालय रुग्णालयात उपचारासाठी पाठवण्यात आले. डॉक्टरांनी सांगितले की, फेव्हिकॉल डोळ्यांसाठी खूप धोकादायक असू शकतो. सुदैवाने वेळीच उपचार मिळाल्यामुळे मोठी दुर्घटना टळली आणि मुलांची दृष्टी गेली नाही. सध्या आठही विद्यार्थ्यांवर रुग्णालयात उपचार सुरू आहेत. यामधील एका विद्यार्थ्याला डिस्चार्ज देण्यात आला आहे. तर इतर विद्यार्थ्यांवर डॉक्टरांच्या देखरेखीखाली उपचार सुरू आहेत.

हे प्रकरण जिल्हा प्रशासनापर्यंत पोहचले. तातडीने कडक उपाययोजना करण्यात आल्या. या घटनेनंतर सेवाश्रम शाळेच्या मुख्याध्यापकाला निलंबित करण्यात आले. या प्रकरणाची उच्चस्तरीय चौकशी करण्याचे आदेश जिल्हाधिकाऱ्यांनी दिले. ही घटना नेमकी कशी घडली याबाबत अधिकाऱ्यांकडून मुलांची विचारपूस सुरू आहे. मुलांच्या सुरक्षिततेमध्ये निष्काळजीपणा खपवून घेतला जाणार नाही असं अधिकाऱ्यांनी सांगितले.