जोधपूरमध्ये सैन्य भरतीदरम्यान घडलेली दुःखद घटना आता राज्यभरात चर्चेचा विषय ठरत आहे. केवळ २२ वर्षांच्या तरुणाचे अशा प्रकारे निधन होणे ही अत्यंत वेदनादायी बाब ठरत आहे. बिकानेर जिल्ह्यातील मुन्नीराम सैन्यात भरती होण्यासाठी मेहनत घेत होता. भरतीतील सर्वात महत्त्वाच्या टप्प्यावर म्हणजेच धावण्याच्या शर्यतीदरम्यान त्याचा हृदयविकाराच्या झटक्याने मृत्यू झाला.

बिकानेर जिल्ह्यातील श्रीदुंगरगड तालुक्यातील रहिवासी मुन्नीराम गेल्या तीन वर्षांपासून सरकारी नोकरीसाठी कठोर मेहनत घेत होता. विशेषत: सैन्यात भरती होण्याचे त्याचे स्वप्न होते. नोकरी मिळवून कुटुंबाला हातभार लावण्याचा त्याचा प्रयत्न होता. २१ ऑगस्टच्या रोजी जोधपूरच्या मंडोर येथे सैन्य भरती मेळावा आयोजित करण्यात आला होता. हजारो तरुण या मेळाव्यात सहभागी झाले होते.

सैन्य भरती प्रक्रियेत सर्वात महत्त्वाची मानली जाणारी शर्यत सुरु झाल्यावर मुन्नीरामदेखील उत्साहाने धावत होता. त्याच्या कुटुंबीयांच्या मते, ते फार परिश्रमपूर्वक आणि आत्मविश्वासाने भरतीची तयारी करत होता. शर्यतीदरम्यान तो प्रथम फिनिशिंग लाईन जवळ पोहोचले असताना अचानक जमिनीवर कोसळले. काही क्षणांनी तो उठला आणि पुन्हा धावण्याचा प्रयत्न केला, परंतु पुन्हा तो बेशुद्ध पडला.

घटनेनंतर आयोजकांनी तातडीने त्याला मंडोर रुग्णालयात नेले. मात्र त्याची प्रकृती सुधारली नाही आणि त्यानंतर त्याला एमडीएम रुग्णालयात हलविण्यात आले. डॉक्टरांनी प्रयत्न केले तरीही २२ ऑगस्ट रोजी पहाटे चार वाजता त्याला मृत घोषित करण्यात आले. प्राथमिक वैद्यकीय अहवालानुसार, मुन्नीरामला धावताना हृदयविकाराचा तीव्र झटका आल्याने त्याचा मृत्यू झाला असल्याचे सांगण्यात येत आहे. त्याच्या शरीरावर कोणतीही बाह्य दुखापत नव्हती, असे डॉक्टरांनी स्पष्ट केले आहे.

मुन्नीरामच्या अचानक झालेल्या निधनाने त्यांच्या कुटुंबावर शोककळा पसरली आहे. त्याच्या भावाने रामनिवासने सांगितले की, “मुन्नीराम पूर्ण ताकदीने धावत होता, तो खूप दिवसांपासून यासाठी तयारी करत होता. पण अचानक तो खाली पडला. त्याला बाहेरून कोणतीही इजा नव्हती, पण तो पुन्हा उठू शकला नाही.”

या घटनेने भरतीसाठी आलेल्या शेकडो तरुणांनाही धक्का बसला आहे. आपल्या समोर घडलेली ही घटना पाहून अनेक जण हादरले होते. सैन्य भरतीसारख्या कष्टप्रद प्रक्रियेत तरुणांचे प्राण जाऊ नयेत यासाठी आरोग्य तपासणीची प्रक्रिया अधिक काटेकोरपणे व्हावी अशी मागणी काही ठिकाणाहून होत आहे. विशेषत: हृदयविकारासारख्या गंभीर आजारांची पूर्वतपासणी करूनच उमेदवारांना भरतीत सहभागी होऊ द्यावे, अशी मागणी आता पुढे येत आहे.