Summary -

• वाराणसीतील हॉटेलमध्ये बहीण-भावांचे मृतदेह आढळले

• दोघेही हैदराबादहून आले होते

• दोघांनी आत्महत्या केल्याचा अंदाज पोलिसांनी वर्तवला

• बहिणीच्या अस्थी विसर्जनासाठी ते वाराणसीला आले होते

• घटनास्थळी सुसाईड नोट आणि काही औषधं सापडली

उत्तर प्रदेशच्या वाराणसीमधील एका हॉटेलमध्ये बहीण-भावांचे मृतदेह आढळल्यामुळे खळबळ उडाली. हैदराबादमधून बहीण-भाऊ वाराणसीमध्ये आले होते. गणेश गौड (४६ वर्षे) आणि धनलक्ष्मी (३८ वर्षे) अशी आत्महत्या केलेल्या बहीण- भावांची नावं आहेत. आपल्या मोठ्या बहिणीच्या अस्थी विसर्जन करण्यासाठी दोघे वाराणसी येथे आले होते. कँट बस स्टेशनजवळील एका हॉटेलमध्ये त्यांनी खोली बुक केली होती. त्याठिकाणीच त्यांनी टोकाचे पाऊल उचलले. पोलिसांनी घटनास्थळी धाव घेत दोघांचे मृतदेह ताब्यात घेतले. घटनास्थळी पोलिसांना सुसाईड नोट सापडली.

१० फेब्रुवारीला गणेश गौड यांच्या बहिणीचा तेरावा होता. त्याच दिवशी सकाळी त्यांना हॉटेलमधून चेक आऊट करायचे होते. त्यांचा प्लान होता की चेक आऊट करण्यापूर्वी गंगा नदीत अस्थी विसर्जन करून धार्मिक विधी करायचा. पण ते सकाळी खोलीतून बाहेर आलेच नाही. दुपार झाली तरी ते खोलीतून बाहेर आले नाही त्यामुळे हॉटेलच्या कर्मचाऱ्यांनी त्यांच्या खोलीत कॉल केला तर काहीच प्रतिसाद आला नाही. त्यानंतर हॉटेलच्या कर्मचाऱ्यांनी पोलिसांना बोलावले.

पोलिसांनी घटनास्थळी धाव घेत खोलीचा दरवाजा उघडून आत प्रवेश केला. तर गणेश गौड आणि त्यांच्या बहिणीचा मृतदेह बेडवर पडलेला होता. दोघांच्या तोंडातून फेस येत होता. खोलीतील टेबलावर पाण्याची बाटली, विविध गोळ्या आणि औषधांची पाकिटं आढळून आली. घटनास्थळावरून पोलिसांनी औषधं, सहा लाखांपेक्षा जास्त रोख रक्कम आणि एटीएम जप्त केले.

घटनास्थळी एक सुसाईड नोट सापडली त्यामध्ये 'Forgive Us' आणि 'Sorry' असे लिहिण्यात आले होते. पोलिस हा एक महत्वाचा पुरावा मानत आहेत. हे आत्महत्याचे प्रकरण वाटत आहेत. पोलिस या दुहेरी आत्महत्या प्रकरणाचा तपास करत आहेत. शवविच्छेदन अहवाल समोर आल्यानंतर नेमका मृत्यू कशामुळे झाला याचे कारण समोर येईल. हे दोघेही मूळचे हैदराबादचे होते. पोलिस त्यांच्या कुटुंबीयांना संपर्क करण्याचा प्रयत्न करत आहेत.