Summary -

• खामेनेईंच्या मृत्यूनंतर जगभरातील शिया मुस्लिम आक्रमक झाले आहेत

• जगभरात शिया मुस्लिमांची संख्या २० ते २६ कोटी आहे

• इराण, इराक, अझरबैजान, बहरीन, लेबनॉन आणि येमेनमध्ये शिया मुस्लिम बहुसंख्य

• भारतात ३ ते ५ कोटी शिया मुस्लिम राहतात

अमेरिका आणि इस्रायलने २८ फेब्रुवारीला संयुक्तपणे इराणवर हल्ला केला. या हल्ल्यामध्ये इराणचे सर्वोच्च नेते अली खामेनेई यांचा मृत्यू झाले. यामुळे इराणमधील शिया मुस्लिमांमध्ये संतापाची लाट उसळली आहे. खामेनेई यांच्या निधनानंतर इराणमध्ये आंदोलन आणि निदर्शने केली जात आहेत. खामेनेई यांच्या मृत्यूमुळे फक्त इराणमधील शिया मुस्लिमच नाही तर जगभरातील शिया मुस्लिमही शोक व्यक्त करत आहेत. इराण युद्धानंतर मध्यपूर्वेत सुरू असलेल्या अशांततेदरम्यान शिया आणि सुन्नी मुस्लिमांबद्दल जोरदार चर्चा होऊ लागली आहे.

इस्लाममध्ये शिया मुस्लिम सुन्नी मुस्लिमांपेक्षा कमी संख्येने आहेत. शिया मुस्लिम स्वतःला पैगंबर मुहम्मद आणि त्यांचे चुलत भाऊ आणि जावई हजरत अली यांचे वंशज मानतात. ते सुन्नी मुस्लिमांसारखे पहिले तीन खलीफांना नाहीतर अलीलाच आपला पहिला इमाम मानतात. जगभरामध्ये शिया मुस्लिम यांची लोकसंख्या किती आहे? हे आपण जाणून घेणार आहोत...

जगभरातील मुस्लिम समुदाय हा एक मोठा आणि वैविध्यपूर्ण समुदाय आहे. अंदाजानुसार जगभरात शिया मुस्लिमांची संख्या अंदाजे २० कोटी ते २६ कोटी आहे. एकूण इस्लामिक लोकसंख्येच्या टक्केवारी म्हणून त्यांचा विचार केल्यास, ते एकूण लोकसंख्येच्या अंदाजे १० टक्के ते १३ टक्के आहेत. म्हणजेच प्रत्येक १०० मुस्लिमांपैकी १० ते १३ मुस्लिम शिया आहेत. जगभरात शिया मुस्लिम लोकसंख्या मोठ्या प्रमाणात आहे. असे काही देश आहेत जिथे शिया मुस्लिम बहुसंख्य आहेत. अशा देशांच्या संस्कृती, सामाजिक-सांस्कृतिक आणि धार्मिक जीवनात ते महत्त्वपूर्ण भूमिका बजावतात. शिया समुदाय हा जागतिक मुस्लिम समुदायाचा एक महत्त्वाचा आणि प्रभावशाली घटक मानला जातो.

इराण, इराक, अझरबैजान, बहरीन, लेबनॉन आणि येमेनमध्ये शिया मुस्लिमांची संख्या मोठी आहे. या देशांमध्ये शिया मुस्लिम लोकसंख्या ३५ टक्के ते ९० टक्क्यांपर्यंत आहे. इराणच्या लोकसंख्येच्या ९० ते ९५ टक्के शिया मुस्लिम आहेत. अझरबैजानमध्ये ६५ ते ७५ टक्के लोकसंख्या शिया मुस्लिम आहे. बहरीनमध्ये ६५ ते ७५ टक्के लोकसंख्या शिया मुस्लिम आहे. इराकमध्ये ६५ ते ७० टक्के लोकसंख्या शिया मुस्लिम आहे. लेबनॉनमध्ये अंदाजे ४५ ते ५५ टक्के शिया मुस्लिम असून ते राजकीयदृष्ट्या खूप मजबूत आहेत. येमेनमध्ये लोकसंख्येच्या ३५ ते ४५ टक्के लोक शिया मुस्लिम आहेत.

भारतातील शिया मुस्लिम लोकसंख्येचा विचार केला तर इराणनंतर भारतात मोठ्या संख्येने शिया मुस्लिम राहतात. जरी ते भारतात अल्पसंख्याक असले तरी इराणनंतर सर्वात जास्त शिया मुस्लिम असलेला भारत दुसऱ्या क्रमांकाचा देश आहे. भारतात अंदाजे ३ कोटी ते ५ कोटी शिया मुस्लिम आहेत. भारतातील एकूण मुस्लिम लोकसंख्येच्या १० ते १५ टक्के शिया मुस्लिम आहेत. उत्तर प्रदेश, बिहार, जम्मू आणि काश्मीर आणि हैदराबाद सारख्या राज्यांमध्ये मोठ्या प्रमाणात शिया मुस्लिम राहतात.