PM Narendra Modi On Terrorism : पंतप्रधान नरेंद्र मोदी यांनी मंगळवारी शांघाय सहकार्य संघटनेच्या (SCO Meet) बैठकीत दहशतवादाच्या मुद्द्यावरून पाकिस्तान आणि चीन या शेजारी देशांना खडेबोल सुनावले. सर्व देशांनी अन्य देशांच्या सीमा आणि सार्वभौमत्वाचा सन्मान करायला हवा, असं मोदी म्हणाले. विशेष म्हणजे दहशतवादाच्या मुद्द्यावर पंतप्रधान मोदी हे कानपिचक्या देत असताना, या बैठकीत पाकिस्तानचे पंतप्रधान शाहबाज शरीफ आणि चीनचे अध्यक्ष शी जिनपिंगही सहभागी झाले होते. (National News)

पंतप्रधान नरेंद्र मोदी (Narendra Modi) हे शांघाय सहकार्य संघटनेच्या बैठकीत व्हिडिओ कॉन्फरन्सिंगद्वारे सहभागी झाले होते. यात ते म्हणाले की, 'मागील दोन दशकांमध्ये एससीओ (SCO) आशियाई प्रदेशाच्या समृद्धी, शांतता आणि विकासाकरिता प्रमुख व्यासपीठ म्हणून उदयास आले आहे.' यावेळी मोदींनी पाकिस्तान आणि चीनचं नाव न घेता त्यांच्यावर निशाणा साधला. सर्व देशांनी अन्य देशांच्या सार्वभौमत्वाचा आदर करायला हवा, असं ते म्हणाले.

पंतप्रधान मोदींच्या अध्यक्षतेखाली शांघाय सहकार्य संघटनेची ही बैठक झाली. या बैठकीत चीनचे अध्यक्ष शी जिनपिंग, रशियाचे अध्यक्ष व्लादिमीर पुतीन, पाकिस्तानचे पंतप्रधान शाहबाज शरीफ हे देखील सहभागी झाले होते. एससीओकडे एक कुटुंब म्हणून बघतो, असं यावेळी मोदींनी सांगितले.

पाकिस्तानचे कान पिळले

पाकिस्तानचे पंतप्रधान शाहबाज शरीफच्या उपस्थितीत पंतप्रधान मोदींनी दहशतवादाच्या मुद्द्यावर आक्रमक भूमिका घेतली. दहशतवाद हा प्रादेशिक आणि जागतिक शांततेसाठी धोकादायक आहे. आपल्या सर्वांनी मिळून त्याचा सामना करायला हवा. काही देश सीमेपलीकडील दहशतवादाचा वापर आपल्या धोरणांचा भाग म्हणून करतात. असे देश दहशतवाद्यांना आसरा देतात. एससीओ देशांनी दहशतवादाचा निषेध नोंदवायला हवा. दुटप्पी भूमिका नको, अशा शब्दांत मोदींनी थेट नाव न घेता पाकिस्तानला सुनावलं.