सीडीएस बिपीन रावत (Bipin Rawat) यांचं तामिळनाडूमध्ये (Tamil Nadu ) हेलिकॉप्टर अपघातात (Helicopter Crash)निधन झालं. हेलिकॉप्टरमधील 14 जणांपैकी 13 जणांचा मृत्यू झाला तर एक जण गंभीर जखमी आहेत त्यांच्यावर उपचार सुरु आहेत. बिपीन रावत आणि त्यांची पत्नी मधुलिका रावत यांचं पार्थिव आज सायंकाळपर्यंत दिल्लीमध्ये आणलं जाणार आहे. लष्कराच्या सर्वोच्च अधिकाऱ्याच्या एवढ्या तंत्रज्ञानाने भरलेल्या हेलिकॉप्टरमध्ये निधन झाल्यामुळे अनेक लोक शंका उपस्थीत करत आहेत. यावर शिवसेना खासदार संजय राऊत (Sanjay Raut) यांनी आपलं मत मांडलं आहे. ते दिल्लीत बोलत होते.

सध्या चीन सोबत तणावाची परिस्थिती आहे, पाकिस्तानच्या सीमेवर सुद्धा कुरापती सुरू आहेत, अशा वेळी देशाच्या सेनापतीचा मृत्यू होतो, त्यामुळे लोकांच्या मनात नक्कीच शंका आहे. अशा भावना खासदार संजय राऊत यांनी व्यक्त केल्या आहेत. रावत यांच्या मृत्यूनंतर देशभरातून हा घातपात असेल अशी शक्यता व्यक्त केली जात आहे. याबद्दल बोलताना राऊत यांनी 1952 मध्ये घडलेली जुनी घटना सांगितली.

पुढे तो बोलताना संजय राऊत म्हणाले 1952 साली पुंछ भागात लष्करी अधिकाऱ्यांना घेऊन जाणारं विमान कोसळलं होतं, त्यामध्ये लेफ्टनंट जनरल पदाचे अधिकारी होते. तेव्हापासून हवाई प्रवासात अधिकाऱ्यांनी सावधानता बाळगावी आणि एकापेक्षा जास्त अधिकाऱ्यांनी एकत्र प्रवास करु नये अशा सुचना त्यावेळी देण्यात आल्या होत्या. तसेच हा मुद्दा जर संसदेत चर्चेत आला तर लोकांच्या मनातील प्रश्न आम्ही विचारू असंही राऊत यांनी सांगितलं.

Edited By: Pravin Dhamale