Diwali Accident : देशभरात दिवाळीची (Diwali) धामधुम सुरु आहे. दिवाळीनिमित्त मोठ्या प्रमाणात फटाक्यांची आतषबाजी केली जात आहे. दिवाळी हा दिव्यांचा सण आहे असं म्हटलं जातं. त्यामुळे दिवाळीत घरासह सर्व परिसर आपण दिव्यांनी उजळून काढत असतो.

मात्र, याच दिव्यांमुळे दोन जणांचा होरपळून मृत्यू झाल्याची हृदयद्रावक घटना समोर आली आहे. दिवाळीनिमित्त लक्झरी बसमध्ये (Luxury Bus) दिवे लावून झोपलेल्या चालक, क्लिनरसह संपुर्ण गाडी जळून खाक झाल्याची दुर्देवी घटना रांचीमधील (Ranchi) लोअर बाजार पोलीस ठाणे (Lower Bazar Police Station) भागात खादगढा बस स्टँडवर घडली आहे.

पाहा व्हिडीओ -

मिळालेल्या माहितीनुसार, दिवाळीनिमित्त बसच्या चालक आणि वाहकाने आपल्या बसमध्ये देखील दिवे लावले आणि ते गाडीत झोपले. मात्र या दिव्याने काही वेळात पेट घेतल्यामुळे संपुर्ण गाडी जळून खाक झाली आणि दुर्दैवाने गाडीमध्ये झोपलेल्या ड्रायव्हर आणि क्लिनरचा होरपळून मृत्यू झाला.

या घटनेची माहिती मिळताच पोलीस प्रशासनासह अग्निशमन दलाला (Fire Brigade) माहिती देण्यात आली होती. मात्र, अग्निशमन दल पोहोचेपर्यंत बस पुर्णपण जळून गेली होती. तर पोलिसांनी ड्रायव्हर आणि क्लिनरचा (Driver and Cleaner) जळालेले मृतदेह शवविच्छेदनासाठी पाठविले आहेत.

दरम्यान, देशभरात दिवाळीच्या रात्री आगी लागण्याच्या अनेक घटना घडल्या आहेत. यात काही जणांना गंभीर दुखापती देखील झाली आहे. पुण्यातील (Pune) औंध येथे फटाक्यांमुळे लागलेल्या आगीमध्ये थ्री बीएचके फ्लॅटचा जळून अक्षरश: कोळसा झाला आहे.