Rain Alert in 17 States : मान्सूननं केरळमध्ये धडक दिली आहे. त्यापूर्वीच अनेक राज्यांमध्ये पाऊस कोसळत आहे. काही राज्यांमध्ये हलक्या आणि मध्यम स्वरूपाचा पाऊस पडत आहे. आता पुढील दोन दिवसांसाठी हवामान विभागाने पावसाचा इशारा दिला आहे. दिल्ली, उत्तर प्रदेश, झारखंड, उत्तराखंड आणि हिमाचल प्रदेशासह १७ राज्यांमध्ये वादळी पाऊस कोसळण्याची शक्यता व्यक्त करण्यात आली आहे. या काळात वादळी वारे वाहण्याची शक्यता असून, मोठे नुकसान होऊ शकते, असाही अंदाज आहे.

भारतीय हवामान विभागाच्या अंदाजानुसार, येत्या काही दिवसांत अनेक राज्यांमध्ये वादळी पाऊस कोसळण्याची शक्यता आहे. ८० ते ९० किलोमीटर प्रतितास वेगाने वारे वाहतील. या काळात कोणताही अनर्थ घडू नये यासाठी नागरिकांनी सतर्क राहावे, असे आवाहन हवामान विभागाकडून करण्यात आले आहे. वादळी पाऊस सुरू असताना शेतकरी आणि नागरिकांनी सुरक्षित ठिकाणी जावे, असेही सांगण्यात आले आहे. वादळी पावसासह काही राज्यांमध्ये गारपीट होण्याची शक्यताही व्यक्त करण्यात आली आहे.

जूनचा पहिला आठवडाही संपत आला तरी अनेक राज्यांमध्ये अजूनही ऊन पावसाचा खेळ सुरू आहे. कधी ऊन्हाचे चटके तर कधी शिडकाव्यामुळं गारवा पसरत आहे. काही दिवसांपूर्वी बऱ्याच राज्यांमध्ये उष्णतेची लाट आली होती. त्यामुळे नागरिकांना घराबाहेर पडणेही कठीण झाले होते. मात्र, पावसाच्या सरींमुळं काही प्रमाणात दिलासा मिळाला आहे. हवामान विभागानुसार, येत्या दोन दिवसांत १७ राज्यांत पावसासह वादळी वाऱ्याचा इशारा दिला आहे. दिल्ली, उत्तर प्रदेश, बिहार, झारखंड, हरयाणा, पंजाब, हिमाचल प्रदेश, जम्मू-काश्मीर, राजस्थान, आसाम, मध्य प्रदेश, छत्तीसगड, पश्चिम बंगाल, उत्तराखंड, ओडिशा, केरळ, त्रिपुरा या राज्यांना अलर्ट दिला आहे.

दिल्ली, उत्तर प्रदेश, पंजाब, मध्य प्रदेश, आसाम आणि केरळमध्ये ६ जून रोजी वादळी पावसाचा अलर्ट दिला आहे. या काळात या राज्यांतील काही भागांत गारपीट होण्याची शक्यता आहे. उर्वरित बिहार, झारखंड, हरयाणा, जम्मू-काश्मीर, राजस्थान, छत्तीसगड, पश्चिम बंगाल, उत्तराखंड, ओडिशा, हिमाचल प्रदेश आणि त्रिपुरामध्ये ६ आणि ७ जून या दोन दिवसांसाठी वादळी पावसाचा इशारा दिला आहे.

अनेक राज्यांत उद्या आणि परवा असे दोन दिवस वेगवान वारे वाहण्याची शक्यता व्यक्त करण्यात येत आहे. त्यामुळे मोठ्या प्रमाणात नुकसान होण्याची भीती आहे. या कालावधीत नागरिकांनी विशेष काळजी घ्यावी, असे आवाहन हवामान विभागाकडून करण्यात आले आहे.