Lucknow News: गेल्या काही दिवसात विमानात प्रवाशांच्या गैरवर्तनाच्या अनेक बातम्या तुमच्या कानावर आल्या असतील. मात्र आता अशीच एक घटना रेल्वेत घडली आहे. ट्रेनमध्ये टीसीने महिलेसोबत गैरवर्तन केल्याची घटना समोर आली आहे.

नशेत असलेल्या टीसीने रविवारी रात्री ट्रेनमध्ये महिलेच्या डोक्यात लघवी केली. अमृतसरहून कोलकाता जाणाऱ्या अकाल तख्त एक्स्प्रेसमध्ये हा सगळा प्रकार घडला आहे. ट्रेन लखनौला पोहोचल्यावर प्रवाशाच्या तक्रारीवरून टीटीईला अटक करण्यात आली.

पोलिसांनी दिलेल्या माहितीनुसार, एक महिला आपल्या पतीसोबत अकाल तख्त एक्स्प्रेसच्या ए वन डब्यातून प्रवास करत होती. रात्री बारा वाजण्याच्या सुमारास महिला आपल्या सीटवर आराम करत असताना मद्यधुंद अवस्थेत असलेल्या टीटीई मुन्ना कुमार याने तिच्या डोक्यात लघवी केली. (Latest Marathi News)

महिलेने आरडाओरड केल्यानंतर प्रवाशांनी टीसीला बेदम चोप दिला. टीटीई नशेत असल्याचे प्रवाशांनी सांगितले. महिलेच्या पतीच्या तक्रारीवरून टीसीविरोधात गुन्हा नोंदवण्यात आला असून त्याला अटक करण्यात आली आहे.

चारबाग रेल्वे स्थानकावर टीटीई मुन्ना कुमारला जीआरपी निरीक्षक नवरत्न गौतम यांनी ट्रेनमधून खाली उतरवले आणि प्रवाशाच्या तक्रारीवरून गुन्हा दाखल करण्यात आला. टीटीई मुन्ना कुमार सहारनपूरमध्ये कार्यरत आहे. त्यांची न्यायालयीन कोठडीत रवानगी करण्यात आली आहे.