Aap Party News:

दिल्लीचे मुख्यमंत्री अरविंद केजरीवाल तुरुंगात गेल्यानंतर आम आदमी पक्षामध्ये एका मागून एक मोठ्या घडामोडी घडताना दिसत आहे. यातच आता एक मोठी बातमी समोर आली आहे. दिल्ली सरकारमधील मंत्री आणि आप नेते राजकुमार आनंद यांनी मंत्रीपदाचा आणि पक्षाचा राजीनामा दिला आहे.

दलित आमदार, नगरसेवक आणि मंत्र्यांचा पक्ष आदर करत नसल्याचे राजकुमार आनंद यांचे म्हणणे आहे. दलितांची फसवणूक झाली आहे. या सर्व गोष्टींमुळे मला पक्षात राहणे अवघड झाले आहे, त्यामुळे मी पदाचा आणि पक्षाचा राजीनामा देत आहे, असं ते म्हणाले आहे.  (साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

दिल्लीचे समाजकल्याण मंत्री राजकुमार आनंद यांनीही पक्षावर भ्रष्टाचाराचे आरोप केले आहेत. आम आदमी पक्षाचा जन्म भ्रष्टाचाराशी लढण्यासाठी झाला होता, मात्र आज तो पक्षच भ्रष्टाचारात बुडाला आहे, असे ते म्हणाले.  (Latest Marathi News)

ते म्हणाले, ''मी या सरकारमध्ये काम करू शकत नाही आणि माझे नाव या भ्रष्टाचाराशी जोडले जावे, असे मला वाटत नाही.'' आम आदमी पक्षाचे राष्ट्रीय अद्यक्ष आणि दिल्लीचे मुख्यमंत्री अरविंद केजरीवाल तथाकथित मद्य घोटाळ्याशी संबंधित मनी लाँड्रिंग प्रकरणात तुरुंगात गेले असताना राजकुमार आनंद यांचा राजीनामा आला आहे.

लोकसभा निवडणुकीच्या पार्श्वभूमीवर राजकुमार आनंद यांनी राजीनामा दिल्याने आपला मोठा धक्का बसला आहे. राजीनामा देण्याच्या वेळेबाबत विचारलेल्या प्रश्नाच्या उत्तरात राज कुमार आनंद म्हणाले, कालपर्यंत आम आदमी पक्षाच्या नेत्यांना उगाच आपल्याला यात फसवलं जात होतं, असं वाटत होतं. मात्र दिल्ली उच्च न्यायालयाच्या निर्णयानंतर असे दिसते की नक्कीच काहीतरी चुकीचं घडलं आहे. आमच्याकडून चूक झाली आहे.