पंजाबमधील लॉ कॉलजेमध्ये हादरवणारी घटना घडली आहे. एका विद्यार्थ्याने त्याच्या वर्गातील एका विद्यार्थिनीवर क्लासरुममध्ये गोळ्या झाडल्या त्यानंतर विद्यार्थ्याने स्वतःच्या डोक्यात देखील गोळ्या झाडल्या. या गोळीबारात विद्यार्थिनीचा जागीच मृत्यू झाला असून आरोपी विद्यार्थ्याला गंभीर अवस्थेत रुग्णालयात दाखल करण्यात आले आहे. या घटनेने कॉलेज परिसरात भीतीचे वातावरण निर्माण झाले असून प्रेम प्रकरणातून ही हत्या केल्याची प्राथमिक अंदाज आहे.

मिळालेल्या माहितीनुसार, मृत मुलीचे नाव संदीप कौर असे आहे तर आरोपी विद्यार्थ्याचे नाव प्रिन्स राज असे आहे. हे दोघेही पंजाबच्या तरन तारन जिल्ह्यातील माई भागो लॉ कॉलेजमध्ये पहिल्या वर्षात शिकत होते. दरम्यान आज सकाळच्या सुमारास लेक्चर सुरु होण्याच्या काही तास आधी कॉलेजच्या एका वर्गात प्रिन्स राजने संदीप कौर या विद्यार्थिनीच्या डोक्यात गोळ्या घालून हत्या केली.

धक्कादायक म्हणजे प्रिन्सने वर्गमैत्रीणीची हत्या केल्यानंतर स्वतःच्या डोक्यात गोळ्या झाडून आत्महत्येचा प्रयत्न केला. मात्र या घटनेत संदीप कौर हीचा मृत्यू झाला असून प्रिन्स राजनला गंभीर अवस्थेत रुग्णालयात दाखल करण्यात आले आहे. घडलेली घटना सीसीटीव्ही मध्ये कैद झाली असून पोलीस घटनास्थळी दाखल झाले आहेत.

पोलिसांनी घटनेचा पंचनामा केला आहे. घटनेचे गांभीर्य लक्षात घेता, पोलिसांनी संपूर्ण लॉ कॉलेज कॅम्पस सील केला आहे, कोणालाही आत येण्यास मनाई केली आहे. दरम्यान पोलिसांच्या प्राथमिक अंदाजात प्रेम प्रकरणातून ही हत्या केली असल्याचं म्हटलं जात आहे. या घटनेनंतर कॉलेज परिसरात तणावाचे वातावरण निर्माण झाले आहे.