बिहारची प्रसिद्ध गायिका मैथिली ठाकुर यांनी भाजपमध्ये प्रवेश केला आहे. भाजप प्रदेशाध्यक्ष दिलीप जायस्वाल यांच्या नेतवृत्वाखाली मैथिली ठाकुर यांनी भाजपमध्ये प्रवेश केला. मैथिली ठाकुर यांनी बॅनीपट्टी विधानसभा मतदारसंघातून निवडणूक लढण्याची इच्छा व्यक्त केली होती.

काही दिवसांपूर्वी मैथिली ठाकुर यांनी भाजपचे वरिष्ठ नेते विनोद तावडे, गृह राज्यमंत्री नित्यानंद राय यांची भेट घेतली होती. या भेटीनंतर मैथिली भाजपमध्ये प्रवेश करणार असल्याची जोरदार चर्चा होती. मात्र, आज चित्र स्पष्ट झालं असून मैथिली यांनी भाजपमध्ये प्रवेश केला आहे. याआधी मैथिली यांनी भाजपच्या वरिष्ठ नेत्यांच्या भेटीनंतर राजकारणात प्रवेश करणार नसल्याचं म्हटलं होतं.

विनोद तावडे आणि नित्यानंद राय यांच्या भेटीनंतर आज मैथिली यांनी भाजपमध्ये प्रवेश केला आहे. मैथिली यांनी स्पष्ट केलं आहे की, निवडणुकीत संधी मिळाल्यास मुधबनी किंवा दरभंगा विधानसभा मतदारसंघातून निवडणूक लढेल. काही दिवसांपूर्वी मैथिली यांनी बेनीपट्टी विधानसभा मतदारसंघातून निवडणूक लढण्याची इच्छा व्यक्त केली होती.

मैथिली अलीनगर विधानसभा मतदारसंघातूनही निवडणूक लढण्याची शक्यता आहे. अलीनगर दरभंगा जिल्ह्यातील खास मतदारसंघ आहे. या मतदारसंघात ब्राह्मण, यादव आणि मुस्लिमांचं वर्चस्व आहे. तिन्ही समाज या निवडणुकीत महत्वाची भूमिका निभावतात. अलीनगर विधानसभा मतदारसंघ हा याआधी मनीगाछी विधानसभा मतदारसंघाचा लाभ होता. मतदारसंघाच्या विभाजनानंतर अलीनगर विधानसभा मतदारसंघ स्वतंत्र करण्यात आला.

नर्मदा महोत्सवात मैथिली ठाकुरने बेनीपट्टी भागातील लोकांशी चांगलं नातं असल्याचं सांगितलं होतं. मी माझ्या राजकीय प्रवासाची सुरुवात बेनीपट्टी भागातून सुरु करेल. मला त्या मतदारसंघामुळे खूप काही शिकायला मिळेल.