पश्चिम बंगालमधील जलपाईगुडीमधून धक्कादायक बातमी समोर येत आहे. भाजप खासदार आणि आमदारावर प्राणघातक हल्ला करण्यात आला आहे. दोन्ही भाजप नेते पूर परिस्थितीचा आढावा घेण्यासाठी गेले होते. साहित्य वाटप करत असताना त्यांच्यावर स्थानिकांनी हल्ला केला. दरम्यान, भाजप आयटी विंगचे प्रमुख अमित मालवीय यांनी दावा केला की, सत्ताधारी तृणमूल काँग्रेसशी संबंधित व्यक्ती या घटनेमागे आहेत. या घटनेनंतर परिसरात खळबळ उडाली आहे.

ही घटना उत्तर बंगालमधील नागरकाटा येथे घडली. भाजप खासदार खगन मुर्मू आणि भाजप आमदार शंकर घोष यांच्यावर नागरिकांनी हल्ला केला. नागरकाटा येथे सध्या पावसाची संततधार सुरू आहे. काही ठिकाणी पूर परिस्थिती निर्माण झाली आहे. दरम्यान, काही नेते मंडळी पूरग्रस्तांना मदत करण्यासाठी गेले.

भाजप खासदार खगेन मुर्मू देखील पूरग्रस्तांच्या मदतीला धावले. त्यांनी नागरकाटा येथे साहित्य वाटप केले. साहित्य वाटप करताना संतप्त नागरिकांनी त्यांच्यावर हल्ला केला. आमदार शंकर घोष यांच्यावरही हल्ला करण्यात आला. यावेळी त्यांनी घटनास्थळावरून पळ काढण्याचा प्रयत्न केला.

दरम्यान, भाजप आयटी विंगचे प्रमुख अमित मालवीय यांनी तृणमूल काँग्रेस आणि पश्चिम बंगालच्या मुख्यमंत्री ममता बॅनर्जी यांच्यावर टीका केली आहे. 'सत्ताधारी तृणमूल काँग्रेसशी संबंधित व्यक्तीचा या घटनेमागे हात आहे', असा आरोप त्यांनी केला. त्यांनी राज्यातील कायदा आणि सुव्यवस्थेच्या परिस्थितीबद्दलही प्रश्न उपस्थित केला आहे.