Shraddha Murder Case : दिल्ली पोलिसांनी श्रद्धा वालकर हत्या प्रकरणाच्या तपासाचा वेग वाढवला आहे. या संदर्भात पोलिसांचे (Police) पथक रविवारी आरोपी आफताबच्या घरी पोहोचले. आफताबने श्रद्धाची हत्या कशी केली, त्यानंतर तिच्या मृतदेहाचे ३५ तुकडे कसे केले, ते कुठे ठेवले, या संपूर्ण घटनेचा सीन रिक्रिएट तयार केले जाईल. त्याआधारे पोलीस हत्येशी संबंधित आणखी अनेक पुरावे गोळा करणार आहेत.

19 नोव्हेंबर रोजी दिल्ली पोलिसांनी (Delhi Police) पुरावे गोळा करण्यासाठी सलग सहाव्या दिवशी मेहरौलीच्या जंगलात शोध घेतला. याशिवाय दिल्ली पोलिसांनी श्रद्धाचा मित्र राहुल आणि गॉडविन यांचीही चौकशी केली. त्याचवेळी पोलिसांनी दुसऱ्यांदा गुरुग्राम गाठून शोधमोहीम राबवली.

आफताबच्या घराबाहेर गर्दी

दिल्ली पोलीस चौकशीसाठी आफताबच्या घरी पोहोचले आहेत. त्याचवेळी त्याच्या घराबाहेर लोकांची गर्दी होऊ लागली आहे. हत्येची घटना प्रकाशझोतात आल्यापासून लोक इथे रील बनवण्यासाठी येऊ लागले आहेत. खबरदारी म्हणून त्याच्या घराबाहेर पोलीस बंदोबस्तही तैनात करण्यात आला आहे.

पोलिसांच्या हाती सीसीटीव्ही फुटेज

श्रद्धा हत्याकांडाच्या तपासात गुंतलेल्या दिल्ली पोलिसांना आफताबचे सीसीटीव्ही फुटेज मिळाले आहे. हे फुटेज १८ ऑक्टोबरचे असले तरी. यामध्ये आफताबच्या हातात एक बॅग दिसत आहे. आफताब 18 ऑक्टोबर रोजी श्रद्धाच्या विकृत मृतदेहाचे उरलेले तुकडे फेकण्यासाठी गेला असावा असा पोलिसांना संशय आहे. पोलिसांना मिळालेल्या सीसीटीव्ही फुटेजमध्ये आफताब तीन वेळा ये-जा करताना दिसत आहे.

पोलिसांनी आफताब आणि श्रद्धा यांचे कपडे जप्त केले

दिल्ली पोलिसांनी आफताबच्या घरात असलेले सर्व कपडे ताब्यात घेतले आहेत. यातील बहुतांश कपडे आफताबचे आहेत. याशिवाय पोलिसांना तेथून श्रद्धाचे कपडेही मिळाले आहेत. दोघांचेही कपडे फॉरेन्सिक तपासणीसाठी पाठवण्यात येणार आहेत, कारण आतापर्यंत त्याने हत्येच्या दिवशी घातलेले कपडे आणि श्रद्धाने घातलेले कपडे पोलिसांनी जप्त केलेले नाहीत. घरातून जप्त केलेल्या कपड्यांवरून नक्कीच काही सुगावा लागतील, अशी शक्यता पोलिसांनी वर्तवली आहे. दिल्ली पोलिसांना आतापर्यंत श्रद्धाच्या मृतदेहाचे 13 तुकडे मिळाले आहेत. मात्र, पोलिसांना अद्याप श्रद्धाचे शीर सापडलेले नाही, तसेच तिचा मोबाईलही सापडलेले नाही.

काय आहे श्रद्धा खून प्रकरण?

मुंबईतील शेफ आणि फोटोग्राफर आफताब पूनावाला याने दिल्लीत त्याची लिव्ह-इन पार्टनर श्रद्धा वलकरची हत्या केली होती. 18 मे रोजी त्याने तिचा गळा दाबून खून केल्याचा आरोप आहे. त्यानंतर तिच्या मृतदेहाचे 35 तुकडे केले, जे त्याने दक्षिण दिल्लीतील मेहरौली भागात घरात सुमारे तीन आठवडे फ्रीजमध्ये ठेवले आणि नंतर ते तुकडे जंगलात फेकून दिले.