अहमदाबाद - यूपी, उत्तराखंड, गोवा आणि मणिपूरमध्ये भाजपला (BJP) दणदणीत विजय मिळाला आहे. दरम्यान, पंतप्रधान नरेंद्र मोदी (PM Narendra Modi) दोन दिवसांच्या गुजरात दौऱ्यावर आहेत. यावेळी पंतप्रधान मोदींनी अहमदाबादमध्ये रोड शो केला. या ठिकाणी त्यांनी विजयी हात करत जनतसमोर शक्ती प्रदर्शन केलं आहे. पाच राज्यांतील विधानसभा निवडणुकांचे निकाल जाहीर झाल्यानंतर मोदी त्यांच्या गृहराज्याच्या दौऱ्यावर आले. गुजरातमध्ये (Gujrat) वर्षाच्या अखेरीस विधानसभा निवडणुका होणार आहेत.

त्यांच्या दोन दिवसांच्या दौऱ्यात पंतप्रधान अहमदाबादमध्ये एका खेल महाकुंभाचे उद्घाटन करतील आणि गांधीनगर जिल्ह्यातील राष्ट्रीय संरक्षण विद्यापीठाच्या पहिल्या दीक्षांत समारंभाला संबोधित करतील. भाजपच्या गुजरात युनिटचे प्रमुख सीआर पाटील यांनी सांगितले की, "पंतप्रधान नरेंद्र मोदी 11 मार्च रोजी सकाळी अहमदाबाद विमानतळावर पोहोचतील. त्यानंतर ते पक्षाच्या मुख्य कार्यालयापर्यंत रोड शो करतील.

ते म्हणाले की, रोड शो दरम्यान पंतप्रधानांच्या पूर्वनिश्चित ठिकाणी विविध अशासकीय संस्था (एनजीओ), संघटना, भाजप कार्यकर्ते आणि मोदींचे हितचिंतक उपस्थित राहतील. पाटील म्हणाले की, कमलममध्ये मोदी भाजपचे खासदार, आमदार, पदाधिकारी आणि प्रदेश कार्यकारिणीच्या सदस्यांशी संवाद साधणार आहेत. त्यांनी सांगितले की त्याच दिवशी संध्याकाळी मोदी अहमदाबादच्या GMDC मैदानावर महापंचायत संमेलनाला संबोधित करतील.या कार्यक्रमासाठी ४७ लाखांहून अधिक लोकांनी नोंदणी केल्याची माहिती त्यांनी दिली. याअंतर्गत राज्यभरात 500 हून अधिक ठिकाणी विविध खेळांचे आयोजन करण्यात येणार आहे.