राज्य सरकारसह केंद्र सरकारने आतापर्यंत अनेक योजना राबवल्या आहेत. लाडकी बहीण योजना राज्यात सुपरहिट ठरली. तशीच बिहारने देखील महिलांसाठी खास योजना राबवली आहे. मुख्यमंत्री महिला रोजगार असं योजनेचं नाव असून, या योजनेतून महिलांच्या खात्यात प्रत्येकी १० हजार रूपये जमा होतील. या योजनेद्वारे केंद्र सरकार महिलांना आर्थिक मदत करणार आहेत.

आज २६ सप्टेंबर रोजी सकाळी ११ वाजता व्हिडिओ कॉन्फरन्सिंगद्वारे पंतप्रधान नरेंद्र मोदी यांनी बिहारमध्ये मुख्यमंत्री महिला रोजगार योजना सुरू केली. या योजनेअंतर्गत राज्यातील ७५ लाख महिलांच्या बँक खात्यात प्रत्येकी १० हजार थेट जमा केले जाणार आहे. यासाठी एकूण ७,५०० कोटी रूपयांचा निधी वितरीत केला जाणार आहे.

शुभारंभाच्या कार्यक्रमात पंतप्रधान मोदी आणि मुख्यमंत्री नितीश कुमार यांच्या उपस्थितीत प्रत्येक लाभार्थी महिलेच्या खात्यात १० हजाराचा पहिला हफ्ता थेट हस्तांतरित केला जाणार आहे. ही रक्कम बेनिफिट ट्रान्सफरच्या माध्यमातून पाठवले जणार आहे. एका महिलेच्या खात्यात एकूण २.१० लाखांपर्यंत निधी जमा होऊ शकते. सरकार या योजनेअंतर्गत लाभार्थी महिलांना १० हजार ते २ लाखांपर्यंतचे लोन देणार आहेत.

मुख्यमंत्री महिला रोजगार योजनेअंतर्गत १.६ कोटींपेक्षा जास्त महिलांनी अर्ज केलाय. यामुळे लघुउद्योग आणि आर्थिक मदत महिलांना मिळणार आहे. या उपक्रमामुळे महिलांना आर्थिक मदतीसोबतच सक्षमीकरणासाठी एक व्यापक मंच मिळणार आहे.