पाकिस्तान आर्थिक दिवाळखोरीच्या उंबरठ्यावर आहे. पाकिस्तानचे पंतप्रधान शाहाबाज शरीफ कर्जावरून चिंतेत आहेत. झोळी पसरायला लाज वाटते असं सांगतायेत. पण दुसरीकडे पंजाब प्रांताच्या मुख्यमंत्री मरियम नवाज यांनी तर कहरच केलाय. त्यांच्या मेकअपसाठी सरकारने तब्बल 4 कोटी रुपयांचा विशेष निधी मंजूर केलाय. एकीकडे सामान्य जनता जिवनावश्यक वस्तूंसाठी झगडताना दिसतीय. दुसरीकडे मुख्यमंत्र्यांच्या सौंदर्यावर होणाऱ्या या उधळपट्टीमुळे पाकिस्तानात संतापाची लाट उसळलीय.

मुख्यमंत्र्यांच्या मेकअपसाठी 4 कोटी?

पंजाब प्रांताच्या मुख्यमंत्री मरियम नवाज यांच्या मेकअपच्या खर्चासाठी पंजाब सरकारच्या कॅबिनेट सचिवांनी 12 जानेवारी रोजी एक अत्यंत गोपनीय आदेश जारी केला होता. या आदेशानुसार, मुख्यमंत्री मरियम नवाज आणि माहिती मंत्री आझम जाहीद बुखारी यांचा मेकअप तसच बैठका आणि जाहीर सभांमध्ये स्वतःला व्यवस्थित सादर करण्यासाठी 4 कोटी रुपयांचं विशेष अनुदान मंजूर करण्यात आलय.

पाकिस्तानी राजकारणात, मरियम नवाज शरीफ केवळ त्यांच्या दमदार आवाजासाठीच नव्हे तर त्यांच्या ड्रेसिंग सेन्ससाठी देखील ओळखल्या जातात. मरियम नवाज यांचा लूक त्यांच्या सुंदरतेमुळे आणि स्टाईलमुळे चर्चेत असतो. मरियम नवाज यांची ही पहिलीच उधळपट्टी नाही. यापूर्वी त्यांच्या सरकारी गाडीचे टायर बदलण्यासाठी 1 कोटी पाकिस्तानी रुपये खर्च केल्याचं प्रकरण चर्चेत होतं. त्यानंतर आता या मेकअपनिधीमुळे त्या पुन्हा चर्चेत आल्या आहेत. सध्या पाकिस्तानात महागाईनं उच्चांक गाठलाय़.

अशा भीषण परिस्थितीत सरकारी पैशानं स्वतःचे सौंदर्य खुलवणे जनतेच्या जखमेवर मीठ चोळण्यासारखं आहे. सरकारच्या या कृतीमुळे पाकिस्तानातली जनता रस्त्यावर उतरू शकते. याठिकाणी नेपाळसारखं आंदोलन पेटू शकतं. त्यामुळे पंजाब सरकार आता या गोपनीय खर्चावर काय निर्णय घेतं? मरियम यांचं सौंदर्य खुलवण्यासाठी हे 4 कोटी दिले जाणार की सरकार हा निर्णय मागे घेणार हेच पाहणं औत्सुक्याचं ठरणार आहे.