ओडिशाच्या नुआपाडा जिल्ह्यातून एक धक्कादायक घटना उघडकीस आली आहे. नुआपाडा रेल्वे स्थानकाजवळ एका महिला पोलीस कॉन्स्टेबलचा मृतदेह झाडाला लटकलेल्या अवस्थेत आढळला. या प्रकरणी पोलिसांनी तपासाच्या आधारे मृत महिलेच्या पती आणि सासूला बेड्या ठोकल्या आहेत. या घटनेनंतर परिसरात खळबळ उडाली आहे.

पोलिसांनी दिलेल्या माहितीनुसार, स्थानिक लोकांनी रेल्वे स्थानकाजवळील झाडाला महिला हवालदाराचा मृतदेह लटकलेल्या अवस्थेत पाहिला. स्थानिक लोकांनी तातडीने नुआपाडा पोलीस ठाण्यात धाव घेतली. तसेच पोलिसांना याची माहिती दिली. पोलिसांनी घटनास्थळी धाव घेऊन मृतदेह खाली आणला.

तसेच मृतदेह शवविच्छेदनासाठी पाठवले. मृत महिलेची ओळख महिला कॉन्स्टेबर म्हणून पटली आहे. महिला पोलीस हवालदाराने मृत्यूआधी सर्वांना एक व्हिडिओ पाठवला होता. या व्हिडिओमध्ये तिनं, सासू आणि पतीकडून होणाऱ्या छळाला कंटाळून आयुष्य संपवत असल्याचं सांगितलं.

नुआपाडा पोलीस ठाण्यातील एका पोलीस अधिकाऱ्याने सांगितले की, 'आम्ही प्रकरणात आत्महत्येस प्रवृत्त केल्याचा गु्न्हा दाखल केला आहे. व्हिडिओची चौकशी सुरू आहे. प्राथमिक तपासात महिलेनं सासू आणि पतीच्या छळाला कंटाळून आत्महत्या केल्याचं स्पष्ट झालं आहे'.

तपासाच्या आधारे पोलिसांनी मृत महिलेच्या पती आणि सासूला अटक केली आहे. त्यांना न्यायालयात हजर करण्यात आले आहे. सध्या पोलिसांकडून अधिक तपास सुरू आहे.