नवी दिल्ली : नवी दिल्ली रेल्वे स्टेशनवर शनिवारी रात्री चेंगराचेंगरी होऊन अनेक भाविकांचा मृत्यू झाल्याची घटना घडली आहे. प्रयागराज येथील महाकुंभमेळ्याला जाण्यासाठी रेल्वे स्टेशनवर मोठ्या संख्येने भाविक पोहोचले होते. त्यासाठी ट्रेन पकडताना उडालेल्या गोंधळानंतर झालेल्या चेंगराचेंगरीत १५ जणांचा मृत्यू झाल्याची घटना घडली आहे.

सूत्रांनी दिलेल्या माहितीनुसार, नवी दिल्ली रेल्वे स्टेशनच्या प्लॅटफॉर्म क्रमांक १४ आणि १५ वर चेंगराचेंगरीची घटना घडल्याची माहिती मिळाली आहे. सूत्रांच्या माहितीनुसार, या चेंगराचेंगरीत अनेक लोक जखमी झाले आहेत. जखमींना जवळील रुग्णालयात दाखल करण्यात आलं आहे.

रात्रीच्या ९ वाजून ५५ मिनिटाला ही चेंगराचेंगरीची घटना घडली. नवी दिल्ली रेल्वे स्टेशनवर झालेल्या चेंगराचेंगरीत ३ लहान मुलांसहित १५ जणांचा मृत्यू झाल्याची माहिती एलएनजेपी रुग्णालयाचे मुख्य आपत्कालीन वैद्यकीय अधिकारी यांनी दिली.

राजनाथ सिंह आणि दिल्लीचे एलजींनी व्यक्त केलं दु:ख

चेंगराचेंगरीची माहिती मिळताच अग्निशमन दलाच्या ४ गाड्या घटनास्थळी पोहोचल्या. पोलीस आणि आरपीएफचे जवानही पोहोचले आहेत. घटनेनंतर स्टेशन तातडीने रिकामे केलं आहे. नवी दिल्ली रेल्वे स्टेशनवरील भाविकांच्या मृत्यूवर पंतप्रधान मोदी, केंद्रीय संरक्षण मंत्री, दिल्लीचे उपराज्यपाल वीके सेक्सेना यांनी दु:ख व्यक्त केल.

पंतप्रधान नरेंद्र मोदी काय म्हणाले?

नवी दिल्ली रेल्वे स्टेशन झालेल्या चेंगराचेंगरीच्या घटनेवर पंतप्रधान मोदींनी दु:ख व्यक्त केलं आहे. त्यांनी म्हटलं की, 'नवी दिल्ली रेल्वे स्टेशनवर झालेल्या चेंगराचेंगरीच्या घटनेने व्यथित झालो आहे. प्रियजन गमावलेल्या व्यक्तीच्या कुटुंबाप्रती संवेदना व्यक्त करतो. मी प्रार्थना करतो की, जखमी झालेले लोक लवकर बरा होवो. संकटकाळी मदत करणाऱ्या अधिकाऱ्यांच्या कामाप्रती नरेंद्र मोदी प्रभावित झाले, असे मोदींनी सांगितले.