प्रमोद जगताप, साम प्रतिनिधी

नवी दिल्ली : लोकसभा निवडणुकीत जनतेने कोणत्याच पक्षाला बहुमत दिलं नाही. चारशे पार चा दावा करणाऱ्या भाजपला साधा २५० चा आकडा गाठता आला नाही. एनडीए मिळून २९४ जागा निवडून आल्यात. त्यामुळे भाजपचं नाही तर एनडीएच सरकार सत्तेत येत आहे.

सत्ता स्थापनेआधी एनडीएमधील नितीश कुमार आणि चंद्रबाबू नायडू यांनी मंत्रालयासंदर्भात चर्चा केलीय. एनडीए सरकारमध्ये भाजपाला मित्रपक्षांना मोठा वाटा द्यावा लागणार आहे. प्रत्येकी ४ खासदारांमागे एक मंत्रिपद असं हे सूत्र ठरल्याची बातमी पुढे आली आहे. पंतप्रधान मोदींनी बुधवारी आपल्या पंतप्रधान पदाचा राजीनामा राष्ट्रपतींकडे दिला. त्यानंतर एनडीएमधील घटक पक्षांची बैठक घेतली. यावेळी २१ पक्षांनी मोदींना समर्थन पत्र दिलं. आता एनडीएच्या सरकारचं मंत्रिमडळ कसं असेल याची माहिती सुत्रांनी दिलीय.

हाती आलेल्या माहितीनुसार, सरकारमधील भाजपला मित्र पक्षांना मोठा वाटा द्यावा लागणार आहे. प्रत्येकी 4 खासदारांच्या मागे एक कॅबिनेट मंत्रीपद असा नवा फॉर्म्युला ठरलाय. नितीश कुमार यांच्या संयुक्त जनता दल पक्षाला ३ मंत्रीपद दिली जाणार आहेत. राष्ट्रीय लोकजन शक्ती पक्ष राम विलास या पक्षाचे नेते चिराग पासवान यांच्या पक्षाला १ कॅबिनेट मंत्रीपद दिले जाणार आहे.

जितनराम मांझी यांच्या हिंदुस्थान आवामी मोर्चा पक्षाला १ कॅबिनेट मंत्री पद दिलं जाणार आहे. चंद्राबाबू नायडू यांच्या तेलगू देसम पक्षाला ४ कॅबिनेट मंत्री पद दिले जाणार आहे. तर एकनाथ शिंदे यांच्या शिवसेनेला १ कॅबिनेट आणि १ राज्यमंत्रिपद मिळणार आहे. अजित पवारांच्या राष्ट्रवादीला १ कॅबिनेट मंत्रिपद, अनुप्रिया पटेल यांच्या अपना दलला १ मंत्रिपद तर जयंत चौधरी यांच्या पक्षाला १ मंत्रिपद आणि पवन कल्याण यांच्या जनसेनेला १ मंत्रिपद देणार असल्याचं सांगितलं जात आहे.

तरीही भाजपकडे महत्वाची ४ खाती राहणार आहेत. भाजप स्वत:कडे गृह, वित्त आणि संरक्षण मंत्रालयासह आणखी एक महत्त्वाचे खाते ठेवणार असल्याचं सांगितलं जात आहे. मिळालेल्या माहितीनुसार, उत्तर प्रदेश, बिहार आणि महाराष्ट्र या ३ राज्यांना डोळ्यासमोर ठेवून महत्त्वाची खाती या राज्यांना दिली जाणार आहेत. एनडीएच्या वाटाघाटीत लोकसभा अध्यक्षपद, अर्थ, गृह आणि रेल्वे मंत्रालयात या खात्यावरून रस्सीखेच सुरू आहे.