प्रमोद जगताप

New Delhi: अजित पवार गट शिंदे सरकारमध्ये सामील झाल्याने राष्ट्रवादीत मोठी फूट पडली आहे. अजित पवारांच्या राजकीय भूमिकेमुळे राज्यातील राजकीय हालचालींना वेग आला आहे. मुंबईत आज दोन्ही गटाकडून राष्ट्रवादी कोणाची, हे दाखविण्यासाठी शक्तिप्रदर्शन करण्यात येणार आहे. याचदरम्यान, राष्ट्रवादीच्या दोन्ही गटाची लढाई केंद्रीय निवडणूक आयोगात देखील पाहायला मिळणार आहे. राष्ट्रवादीच्या दोन्ही गटांनी केंद्रीय निवडणूक आयोगात अर्ज दाखल केले आहे, अशी माहिती सूत्रांनी दिली आहे. (Latest Marathi News)

अजित पवार यांच्याकडून शिंदे सरकारला पाठिंबा देत उपमुख्यमंत्रिपदाची शपथ घेतली. अजित पवारांसहित राष्ट्रवादीच्या एकूण ९ जणांनी मंत्रिपदाची शपथ घेतली.

अजित पवारांच्या भूमिकेमुळे महाविकास आघाडी खिळखिळी झाल्याची राजकीय वर्तुळात चर्चा आहे. तर दुसरीकडे अजित पवार गट हा सरकारमध्ये सामील झाल्याने राष्ट्रवादीतही मोठी फूट पडली आहे. अजित पवारांच्या भूमिकेमुळे राज्याच्या राजकारणात शिवसेना फुटीची पुनरावृत्ती पाहायला मिळाली आहे.

राष्ट्रवादीत फूट पडल्यानंतर आता राजकारणात अजित पवार विरुद्ध शरद पवार असा राजकीय संघर्ष पाहायला मिळत आहे. दोन्ही पवारांची लढाई आता केंद्रीय निवडणूक आयोगात देखील पाहायला मिळणार आहे.

राष्ट्रवादीच्या दोन्ही गटाकडून निवडणूक आयोगात अर्ज दाखल करण्यात आले आहे. अजित पवार यांच्याकडून थेट पक्षावर दावा करण्यात आल्याची माहिती सूत्रांनी दिली आहे. निवडणूक आयोगात अर्ज दाखल केल्यानंतर अजित पवार यांच्या गटाच्या वतीने पक्ष आणि पक्ष चिन्हावर दावा केला आहे, अशी माहिती सूत्रांनी दिली आहे .

दरम्यान, राष्ट्रवादीच्या शरद पवार गटाकडून देखील निवडणूक आयोगात अर्ज दाखल करण्यात आला आल्याची माहिती सूत्रांनी दिली आहे. कोणत्याही गटाने पक्षावर दावा केला तर आमचं म्हणणं ऐकून घ्यावं असे या अर्जात म्हटले आहे. अजित पवार यांच्या बंडानंतर शरद पवार यांनी हे मोठं पाऊल उचललं आहे.