पाकिस्तानमध्ये बसून भारतात दहशवादी कारवाया करणाऱ्या हाफिज सईदचा पाकिस्तानातच आपल्या चेल्या चपाट्यांसोबत खात्मा झाल्याचा दावा करण्यात आलाय...शनिवारी रात्री पंजाब प्रांतातील झेलमधून आपल्या घरी जात असतांना हाफिज सईद आणि अबू कटालला अज्ञात हल्लेखोरांनी धडाधड गोळ्या झाडून संपवलं. हाफिजच्या हत्येनंतर लष्कर ए तोयबा आता सैरभैर झालीये. हाफिजच्या हत्येच्या बातम्यांनी सोशल मीडियावर धुमाकूळ माजलीये.

कोण आहे हाफिज सईद?

हाफिज सईद हा संयुक्त राष्ट्र आणि अमेरिकेनं घोषित केलेला आंतरराष्ट्रीय दहशतवादी आहे. लष्कर ए तोयबा आणि जमात-उद-दावा या दहशतवादी टोळीचा प्रमुख देखील आहे. तो मुंबई 26/11 हल्ल्याचा मास्टरमाईंड आहे. तसेच हाफिज पुलवामा हल्ल्याचा मुख्य सूत्रधार असल्याचेही पुरावे आहेत. अमेरिकेने हाफिजवर तब्बल 1 कोटी डॉलरचं बक्षीस ठेवलं होतं.

हाफिज सईदचा खेळ संपल्याची पाकिस्तानात दबक्या आवाजात चर्चा आहे. सोशल मीडिया प्लॅटफॉर्म एक्स आणि पाकिस्तानी हँडलवर हाफिज सईद ठार झाल्याचा दावा करण्यात येतोय. खुद्द इम्रान खान यांच्या पार्टीच्या एका नेत्यानं तसा दावा केलाय. त्यामुळे हाफिज सईद 'एक्स'वर ट्रेंडिंगमध्ये आहे.

याआधी देखील अनेकदा हाफिज सईद मारला गेल्याच्या अफवा पसरल्या होत्या. परंतु आता झालेला हा हल्ला खरा असून अजून पाकिस्ताननं या घटनेची पुष्टी केलेली नाही. त्यामुळे पाकमधील ट्विटर ट्रेंन्ड पाहता पाकला नापाक करणाऱ्या हाफिजचा खात्मा व्हावा, अशी पाकड्यांची इच्छा असल्याचं दिसत आहे.