Loksabha News: संसदेच्या पावसाळी अधिवेशनचा (Monsoon Session of Parliament) हा शेवटचा आठवडा आहे. मणिपूर हिंसाचारासह (Manipur Clashes) विविध विषयांवर विरोधक आक्रमक आहेत. अशामध्ये आज विरोधकांनी आणलेल्या अविश्वास ठरावावर लोकसभेत चर्चा सुरु आहे. खासदारकी बहाल केल्यानंतर आज लोकसभेमध्ये विरोधी पक्षाकडून राहुल गांधी (Rahul Gandhi) हे पहिले वक्ते असू शकतात. राहुल गांधी नेमकं काय बोलणार याकडे सर्वांचे लक्ष लागले आहे. तर निशिकांत दुबे भाजपच्या बाजूने चर्चा सुरू करू शकतात.

पंतप्रधान नरेंद्र मोदी १० ऑगस्टला संध्याकाळी या चर्चेला उत्तर देतील आणि त्यानंतर विरोधकांनी मतदानाची मागणी केल्यास प्रस्तावावर मतदान केले जाईल. अविश्वास ठरावावरील चर्चेसाठी एकूण १२ तासांचा अवधी निश्चित करण्यात आला आहे. खासदारांच्या संख्येच्या आधारावर सर्व राजकीय पक्षांना सभागृहात बोलण्याची वेळ देण्यात आली आहे. पण गरज भासल्यास सभापती किंवा अध्यक्ष ही मुदत वाढवू शकतात. कोणत्या पक्षा अवश्वास ठरावाच्या चर्चेवर बोलण्यासाठी किती वेळ देण्यात आला आहे हे आपण पाहणार आहोत.

अविश्वास ठरावावरील चर्चेसाठी कोणत्या पक्षाला किती वेळ? -

- भाजप - लोकसभेत भाजपचे सर्वाधिक ३०१ खासदार आहेत. त्यामुळे भाजपला भाषण करण्यासाठी जास्तीत जास्त ६ तास ४१ मिनिटांचा वेळ देण्यात आला आहे.

- काँग्रेस - लोकसभेत काँग्रेसचे ५१ खासदार आहेत. त्यामुळे काँग्रेसला १ तास ९ मिनिटांचा वेळ देण्यात आला आहे.

- द्रमुक - द्रमुकचे २४ खासदार आहेत. त्यामुळे त्यांना ३० मिनिटांचा वेळ देण्यात आला आहे.

- टीएमसी - लोकसभेत टीएमसीचे २३ खासदार आहेत. त्याुळे त्यांना २९ मिनिटांचा वेळ देण्यात आला आहे.

- वायएसआर काँग्रेस - वायएसआर काँग्रेसचे संसदेत २२ खासदार आहेत. त्यामुळे त्यांना २९ मिनिटांचा वेळ देण्यात आला आहे.

- शिवसेना - लोकसभेमध्ये शिवसेनेचे २३ खासदार आहेत. त्यामुळे त्यांना 23 मिनिटांचा वेळ देण्यात आला आहे.

- जेडीयूला २१ मिनिटं, बीजेडीला १६ मिनिटं, बसपाला १२ मिनिटं, एलजेएसपीला ८ मिनिटं देण्यात आली आहेत.

- AIADMK, अपना दल, AJSU, MNF, SKM, NDPP, NPP, APF आणि अपक्षांना १७ मिनिटं देण्यात आली आहेत.

- राष्ट्रवादी काँग्रेस, सपा, सीपीएम, सीपीआय, आययूएमएल, नॅशनल कॉन्फरन्स, जेडीएस, जेएमएम, अकाली दल आणि आपसह उर्वरित सर्व पक्षांना एकूण ५२ मिनिटांची वेळ देण्यात आली आहे.