Hyderabad News: हैदराबादमधील सिकंदराबाद येथे गुरुवारी रात्री आगीची मोठी दुर्घटना घडली आहे. येथे लागलेल्या आगीत होरपळून ४ महिलांचा मृत्यू झालाय. तसेच अन्य २ व्यक्तींचा देखील यात मृत्यू झाला आहे. इमारतीला लागलेली आग इतकी भीषण होती की, धुराचे लोट हवेत दूरवर पसरले होते. (Secunderabad)

मिळालेल्या माहितीनुसार, सिकंदराबादच्या स्वप्नलेक या कॉम्प्लेक्समध्ये काल रात्री आठच्या सुमारास आग लागली. शॉकसर्कीट झाल्याने आग लागल्याचा प्राथमिक अंदाज वर्तवला जात आहे. या घटनेत एका व्यक्तीला धूर जास्त झाल्याने श्वास घेण्यास त्रास होत होता. त्यातच त्यांचा मृत्यू झाला.

पोलिसांनी दिलेल्या माहितीनुसार, या घटनेत आतापर्यंत ६ व्यक्तींचे मृतदेह मिळाले आहेत. यामध्ये चार महिलांचा आगीमध्ये होरपळून मृत्यू झाला आहे. तसेच जखमी व्यक्तींना वेगवेगळ्या रुग्णालयात दाखल करण्यात आले आहे. यातील एका व्यक्तीचा रुग्णालयात उपचारादरम्यान मृत्यू झाला आहे.

आग लागल्याची माहिती मिळताच घटनास्थळी अग्निशमन दलाची वाहने दाखल झाली होती. मात्र आग जास्त पसरल्याने त्यावर नियंत्रण मिळण्यात बराच वेळ गेला. आगीवर नियंत्रण मिळवण्यात यश आल्यानंतर जखमींना तात्काळ रुग्णालयात दाखल करण्यात आले. सध्या त्यांच्यावर उपचार सुरू आहेत.