पश्चिम बंगालची राजधानी कोलकात्ता येथील आनंदलोक रुग्णालयात भीषण आग लागली आहे. घटनेची माहिती मिळताच अग्निशमन दलाच्या गाड्या घटनास्थळी दाखल झाल्या असून उपचार घेत असलेल्या रुग्णांना सुरक्षित ठिकाणी हलवण्यात येत आहे. घटनेच्या वेळी रुग्णालयात किती रुग्ण दाखल होते, हे अद्याप स्पष्ट झालेले नाही.

मिळालेल्या माहितीनुसार, सकाळी 10 वाजेच्या सुमारास या घटनेबद्दल अग्निशमन दलाला फोन आला. त्यानंतर आग विझवण्यासाठी घटनास्थळी तीन अग्निशमन दलाच्या गाड्या पाठण्यात आल्या. अग्निशमन अधिकाऱ्यांनी सांगितले की, सॉल्ट लेकमधील करुणमयी क्रॉसिंग येथील एका खाजगी हॉस्पिटलच्या पहिल्या मजल्यावर आग लागली होती. यामध्ये कुठलीही जीवितहानी झाली नसून कोणीही जखमी झाले नाहीये.

आग लागल्यानंतर लगेचच रुग्णांना स्ट्रेचर आणि व्हीलचेअरच्या साहाय्याने हलवण्यात आले. प्रसारमाध्यमांच्या वृत्तानुसार, अंदाजे ७५ ते ८० रुग्णांना रुग्णालयातून बाहेर काढून दुसऱ्या इमारतीत हलवण्यात आले आहे. दिलासादायक बाब म्हणजे रुग्णालयातील सर्वजण सुरक्षित आहेत. आगीवर नियंत्रण मिळवण्यासाठी प्रयत्न सुरू आहेत.

घटनेचे कारण अद्याप अज्ञात आहे. सूत्रांच्या हवाल्याने 'द टेलिग्राफ'ने दिलेल्या वृत्तानुसार, रुग्णालयाच्या दुसऱ्या मजल्यावर असलेल्या कॅथ लॅबमधून धूर निघताना दिसला. एअर कंडिशनरमधील शॉर्ट सर्किटमुळे आग लागली असावी, असा अग्निशमन दलाला संशय आहे. मात्र, अद्याप कोणतीही अधिकृत माहिती जाहीर करण्यात आलेली नाही.