दिल्लीच्या लाल किल्ल्याजवळ कारमध्ये मोठा स्फोट झाल्याची घटना घडली आहे. या स्फोटानंतर लोकांची एकच धावाधाव झाली. या घटनेत अनेक लोक जखमी झाल्याची माहिती मिळत आहे. मेट्रो स्टेशनपरिसरात ६.४५ वाजता ही स्फोटाची घटना घडली. लाल किल्ल्याजवळील स्फोटामुळे सुरक्षेचा प्रश्न ऐरणीवर आला आहे.

स्फोटानंतर कारला भीषण आग लागली. या आगीत दोन-तीन गाड्या जळून खाक झाल्या आहेत. या आगीचे फोटो आणि व्हिडिओ समोर आले आहेत. लाल किल्ल्याजवळील मेट्रो स्टेशनच्या गेट क्रमांक १ वर ही घटना घडली आहे. या स्फोटानंतर आजूबाजूला उभ्या असलेल्या कारच्या काचा देखील फुटल्या आहेत. स्फोट झाला, त्यावेळी घटनास्थळी मोठी गर्दी होती. या स्फोटानंतर काही जण जखमी झाले. त्यांना तातडीने रुग्णालयात दाखल करण्यात आलं. तर या स्फोटात एकाचा मृत्यू झाल्याची माहिती मिळत आहे.

लाल किल्ल्याजवळ कारमध्ये स्फोट हा सीएनजीमुळे झाला की इतर कशामुळे झाला, याचा शोध अद्याप लागलेला नाही. घटनेची माहिती मिळताच अग्नीशमन दलाच्या ७ गाड्या घटनास्थळी पोहोचल्या. अग्निशमन दलाच्या जवानांकडून आगीवर नियंत्रण मिळवण्याचं काम सुरु आहे.

लाल किल्ल्याजवळील झालेल्या स्फोटामुळे सुरक्षा एजन्सीची झोप उडाली आहे. दिल्लीजवळील फरीदाबादमध्ये आज २९०० किलो अमेनियम नायट्रेट आढळलं. त्यामुळे घातपाताचा संशय देखील व्यक्त करण्यात येत आहे. मात्र याबाबत कोणाकडूनही अधिकृत भाष्य करण्यात आलेलं नाही.