पश्चिम बंगालच्या बर्धमान रेल्वे स्टेशनवर रविवारी सायंकाळी प्रवाशांच्या गर्दीमुळे चेंगराचेंगरी झाल्याची घटना घडली. या घटनेत १०-१२ प्रवासी जखमी झाले. जखमींना तातडीने रुग्णालयात दाखल करण्यात आलं. रुग्णालयात त्यांच्यावर तातडीने उपचार सुरु करण्यात आले आहेत.

मिळालेल्या माहितीनुसार, बर्धमान रेल्वे स्टेशनच्या ४, ६ आणि ७ क्रमांकांच्या प्लॅटफॉर्मवर तीन ट्रेन होत्या. ट्रेन पकडण्यासाठी प्रवाशांनी ४ आणि ६ क्रमांकाच्या प्लॅटफॉर्मचा फुटओवर ब्रिजच्या पायऱ्याजवळ धाव घेतली. या पायऱ्यावर अचानक गर्दी झाल्याने एकच गोंधळ उडाला. या गर्दीने चेंगराचेंगरी झाली. काही प्रवासी एकमेकांच्या अंगावर पडले. या घटनेत अनेक प्रवासी जखमी झाले.

चेंगराचेंगरीच्या घटनेने स्टेशनवर एकच खळबळ उडाली. या घटनेची माहिती मिळताच रेल्वेचं बचाव पथक घटनास्थळी पोहोचलं.घटनेत जखमी झालेल्यांना तातडीने रुग्णालयात दाखल करण्यात आलं. रेल्वे स्टेशनवर दुर्घटना नेमकी का घडली, याचा तपास पोलिसांनी सुरु केला आहे.

नेमकं काय घडलं?

रेल्वे प्रवासी आणि रेल्वे पोलिसांच्या सूत्रांनी दिलेल्या माहितीनुसार, हल्डीबाडी एक्स्प्रेस सायंकाळी ५.३० वाजता प्लॅटफॉर्म क्रमांक ५ वर येत होती. त्याचवेळी प्लॅटफॉर्म क्रमांक ४ वर हावडाच्या मेन लाइनवर एक लोकल ट्रेन उभी होती. एका बाजूने प्रवासी एक्स्प्रेसमधून उतरून ब्रिजवरून जात होते. तर दुसरीकडे हावडा लोकल पकडण्यासाठी ओव्हरब्रिजहून प्लॅटफॉर्मवर जात होते.

या ओव्हरब्रिजवर प्रवाशांना उभं राहण्यासाठी देखील जागा नव्हती. सर्व प्रवासी घाईत होते. यावेळी एक महिला ओव्हरब्रिजच्या पायरीवरून पडली. महिला पडल्यानंतरही लोक थांबले नाही. तर काही प्रवाशांनी आरडाओरड केली. त्यामुळे रेल्वे स्टेशनवर एकच गोंधळ उडाला. या घटनेत ७ ते १० प्रवासी जखमी झाले.