विजयादशमीच्या दिवशी मुर्हूतावरच राष्ट्रीय स्वयंसेवक संघाच्या शाखेवर कारवाई करण्यात आलीय. आरएसएसचा १०० वा वर्धापन दिन साजरा झाला. देशभरात स्वयंसेवक संघाकडून अनेक कार्यक्रमांचंही आयोजन करण्यात आलं. याचदरम्यान तामिळनाडूमध्ये मोठा वाद उफाळून आला. तामिळनाडूमधील पोरूर येथे संघाच्या ३९ स्वयंसेवकांना ताब्यात घेण्यात आलंय.

एका सरकारी शाळेत विनापरवानगी पूजा आणि विशेष शाखा प्रशिक्षण आयोजित केल्याच्या आरोपाखाली संघाच्या या स्वयंसेवकांना ताब्यात घेण्यात आलं. याप्रकरणी पोलिसांनी दिलेल्या माहितीनुसार, संघाच्या स्वयंसेवकांनी अय्यप्पनथंगल सरकारी उच्च माध्यमिक शाळेमध्ये विनापरवानगी गुरूपूजा आणि विशेष शाखा प्रशिक्षण सत्राचं आयोजन केलं होतं. त्यामुळे या स्वयंसेवकांना ताब्यात घेण्यात आलं आहे.

दरम्यान राष्ट्रीय स्वयंसेवक संघाच्या १०० व्या वर्धापन दिनाचं औचित्य साधत केंद्र सरकारने एक विशेष टपाल तिकीट आणि एक विशेष नाणं प्रसिद्ध केलं होतं. केंद्र सरकारच्या या निर्णयावर तामिळनाडूचे मुख्यमंत्री स्टॅलिन यांनी टीका केली होती. भारताच्या राष्ट्रपित्याची हत्या करणाऱ्या कट्टरतावादी स्वप्नांना आकार देणाऱ्या राष्ट्रीय स्वयंसेवक संघाच्या शतक महोत्सवानिमित्त देशाचं नेतृत्व टपाल तिकीट आणि नाणी प्रसिद्ध केल्यावरून त्यांनी टीका केली.