>> प्रमोद जगताप, दिल्ली

Lok Sabha Election 2024:

नवी दिल्ली चार दिवसापूर्वी झालेल्या इंडिया आघाडीच्या बैठकीमध्ये राज्याच्या परिस्थितीनुसार जागावाटप संदर्भात चर्चा झाली होती. आगामी काळात होणाऱ्या लोकसभेच्या निवडणुकीची जागावाटप त्या त्या राज्यातील पक्ष्यांच्या प्रमुखांनी बसून ठरवावं, असं बैठकीत ठरलं होतं. त्या अनुषंगाने जागावाटप संदर्भात अनेक राज्यातील नेत्यांची बैठक सुरू झाली आहे.  ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

महाराष्ट्रामध्ये लोकसभेच्या निवडणुका महाविकास आघाडी म्हणून काँग्रेस उद्धव ठाकरे यांची शिवसेना आणि शरद पवार यांची राष्ट्रवादी काँग्रेस एकत्र निवडणुका लढणार आहेत. त्याच निवडणुकांच्या अनुषंगाने आज राजधानी नवी दिल्लीमध्ये शरद पवार यांच्या दिल्लीतील सहा जनपद या निवासस्थानी काँग्रेस नेते राहुल गांधी आणि शरद पवार यांची बैठक झाल्याची माहिती आहे.  (Latest Marathi News)

या दोन्ही नेत्यांमध्ये जवळपास वीस मिनिटे चर्चा झाली. राज्यातील महाविकास आघाडीचा जागावाटपाचे सूत्र कसं असावं या अनुषंगाने या बैठकीत चर्चा झाल्याची माहिती आहे. इंडिया आघाडीच्या बैठकीनंतर उद्धव ठाकरे यांनी जागावाटप लवकरात लवकर पूर्ण होईल, असं सांगितलं होतं. त्याच अनुषंगाने शरद पवारांच्या राष्ट्रवादी आणि उद्धव ठाकरेंच्या शिवसेनेचे जागावाटप जवळपास निश्चित असल्याचं बोललं जातंय.

सोबत काँग्रेस असल्याने जागा वाटपाचा तिढा दिल्लीतच सुटणार आहे. त्यामुळे राहुल गांधी आणि शरद पवार या दोघांच्या बैठकीनंतर उद्धव ठाकरे यांच्यासोबत शरद पवार चर्चा करू शकतात. त्यानंतर जागा वाटपाचा अंतिम निर्णय राजधानी नवी दिल्लीमध्ये पुन्हा एकदा हे तीन नेते बसून सोडवणार असल्याची देखील माहिती सूत्रांकडून मिळते आहे. 31 डिसेंबर पूर्वी हे जागावाटप पूर्ण होण्याची देखील शक्यता आहे आणि त्याच अनुषंगाने आजच्या बैठकीत चर्चा झाल्याची माहिती आहे.