माणुसकीला काळीमा फासणारी घटना मध्य प्रदेशातील बाहोरीबंद पोलीस स्टेशन हद्दीतील मतवारा गावातून उघडकीस आली आहे. गावातील एका तरूणानं शेताजवळील बेकायदेशीर खाणकामाला विरोध केल्यामुळे त्याच्यावर अमानुष हल्ला केला. या हल्ल्यात त्याच्या आईने हस्तक्षेप करण्याचा प्रयत्न केला. मात्र, तिलाही ओढून मारहाण करण्यात आली. या घटनेनंतर गावात खळबळ उडाली आहे.

राजकुमार चौधरी असं पीडित व्यक्तीचे नाव आहे. त्या तरूणानं शेताजवळील बेकायदेशीर खाणकामाला विरोध केला होता. यामुळे संतप्त झालेल्या गावप्रमुख रामानुज पांडे, त्यांचा मुलगा पवन पांडे, पुतण्या सतीश पांडे आणि इतर गावकऱ्यांनी तरूणाला लोखंडी सळईने जबर मारहाण केली.

मुलावर हल्ला होत असल्याचं समजताच आईनं घटनास्थळी धाव घेतली. तसेच त्याला वाचवण्याचा प्रयत्न केला. मात्र, त्यांचे केस ओढून मारहाण करण्यात आली. मारहाणीदरम्यान, सरपंचाचा मुलगा पवन पांडे यांनी पीडितेवर लघवी करण्यासारखे अमानुष कृत्य केले. तसेच जातीवाचक शिवीगाळ केली.

तक्रार केल्यास तरूणाला जीवे मारण्याचीही धमकी दिली. त्यामुळे पीडित तरूण पुन्हा गावी परतण्यास घाबरत आहे. याप्रकरणानंतर पीडित व्यक्तीनं पोलीस ठाण्यात धाव घेत तक्रार दाखल केली. कटनीचे एसपी संतोष देहरिया यांनी सांगितले की, पीडित व्यक्तीनं पोलीस ठाण्यात तक्रार दाखल केली आहे. संपूर्ण प्रकरणाची चौकशी सुरू असून, दोषींवर कठोर कारवाई केली जाईल, असं ते म्हणाले.