मध्य प्रदेशच्या मैहर भागात एका तरुणाने आत्महत्या केल्याची घटना उघडकीस आली आहे. अमरपाटनमधील पोलिसाच्या जाचामुळे तरुणाने आत्महत्या केली आहे. तरुणाने आत्महत्या करण्यापूर्वी चार पानी चिठ्ठी लिहिली. तसेच त्याने सोशल मीडियावर एक व्हिडिओ देखील शेअर केला आहे. या व्हिडिओमध्ये पोलीस कर्मचाऱ्यासहित ४ जणांवर ब्लॅकमेल, खोटा गुन्ह्यात फसवणे आणि बेकायदेशीरपणे पैसे उकळल्याचा आरोप तरुणाने केलाय. तरुणाच्या आत्महत्येने परिसरात खळबळ उडाली आहे.

मिळालेल्या माहितीनुसार, अनंतराम पटेल असे आत्महत्या केलेल्या तरुणाचे नाव आहे. अनंतराम पटेलचा भाऊ संदिप कुमार यांनी दिलेल्या माहितीनुसार, अनंतरामने आत्महत्या करण्यापूर्वी सोशल मीडियावर एक पोस्ट आणि व्हिडिओ शेअर केला होता. या पोस्टमध्ये मानसिक त्रास, छळ झाल्याचा आरोप केला होता. पोलिसाच्या जाचामुळे आयुष्य संपवत असल्याचे तरुणाने नोटमध्ये नमूद केले होते.

तरुणाने पोस्टमध्ये लिहिले की, 'चार जणांनी मिळून मला खोट्या गुन्ह्यात अडकवण्याची धमकी दिली. त्यामुळे मी घाबरून माझ्याकडून ५ लाख रुपये उकळले'.

अनंतरामने लिहिलेल्या नोटमध्ये लिहिलंय की, पोलिसांच्या जाचामुळे माझी मानस्थिक स्थिती बिघडली आहे. तरुणाने पोलीस कर्मचाऱ्यावरही गंभीर आरोप केलेत. त्याने दावा केला आहे की, मला संबंधित पोलिसाने वारंवार पोलीस स्टेशनला बोलावलं. कारवाईच्या नावाखाली वारंवार धमकावलं. तरुणाने शेवटच्या नोटमध्ये पोलीस कर्मचाऱ्याचा मोबाईल नंबर देखील लिहिलाय. तरुणाच्या आत्महत्येने परिसरात खळबळ उडाली आहे.

तरुणाच्या आत्महत्येनंतर घटनास्थळी स्थानिक लोक आणि नातेवाईक मोठ्या संख्येने पोहोचले. तरुणाच्या आत्महत्येने संतापलेल्या लोकांनी पोलीस स्टेशनसमोरच मृतदेह ठेवला. या प्रकारानंतर पोलीस स्टेशनच्या आवारात मोठ्या प्रमाणात फौजफाटा तैनात करण्यात आला. यावेळी वरिष्ठ पोलीस अधिकाऱ्यांनी आरोपींवर कडक कारवाई केली जाईल, असं आश्वासन आंदोलकांना दिलं. तरुणाची सोशल मीडिया पोस्ट, व्हायरल व्हिडिओ, कॉल डिटेल आणि साक्षीदारांच्या जबाब याची पोलीस कसून चौकशी केली जाईल, असेही वरिष्ठ पोलीस अधिकाऱ्यांनी सांगितले.