Five people dead in early morning crash on Gwalior–Jhansi highway : मध्य प्रदेशमधील ग्वालियरमध्ये आज सकाळी साडेसहा वाजता भयंकर अपघात झाला आहे. वेगात असणाऱ्या अलिशान गाडीला ट्रॅक्टरने जोरात धडक दिली. या अपघातामध्ये पाच जणांचा मृत्यू झाला आहे. अपघातानंतर ग्वालियर-झांसी महामार्गावर मोठ्या प्रमाणात वाहतूक कोंडी झाली होती. सकाळी धुक्यामुळे अधिच स्पष्ट दिसत नव्हते, त्यात कारचा वेग अतिशय होता. त्यामुळे अपघात झाल्याचा प्राथामिक अंदाज व्यक्त रण्यात येत आहे.

ग्वालियर-झांसी महामार्गावर आज सकाळी साडेसहा वाजता फ्यॉर्च्युनर आणि ट्रॅक्टर यांचा भीषण अपघात झाला. अपघाताची माहिती मिळताच पोलिसांनी घटनास्थळावर धाव घेतली. अपघातग्रस्त वाहने महामार्गावरून बाजूला करण्यात आली. पोलिसांनी तात्काळ पंचनामा करत मृतदेह ताब्यात घेतले. पोलिसांकडून मृतदेहाची ओळख पटवण्याचे काम करण्यात येत आहे. पाचही जणांचे मृतदेह पोस्टमार्टमसाठी जवळच्या रूग्णालयात पाठवण्यात आले आहेत.

सकाळी साडेसहा वाजता महामार्गावर भीषण अपघात झाला. महागडी फॉर्च्यूनर कार ( MP 07 CG 9006) अतिशय वेगाने झांसीकडून येत होती. कार मालवा कॉलेज जवळ वेगात येताच वाळूने भरलेल्या ट्रॅक्टरला जोरात धडकली. ही धडक इतकी भयानक होती की कारचा चक्काचूर झाला. समोरील भागाचे तुकडे तुकडे झाले. अपघाताचा आवाज दूरपर्यंत पोहचला होता. कारचा पुढील भाग ट्रॅक्टरमध्ये घुसल्याचे फोटोत दिसतेय. अपघातानंतर स्थानिकांनी धाव घेत मदतकार्य सुरू केले होते. पोलिसांनीही तात्काळ घटनास्थळावर धाव घेतली.

या भीषण अपघातात फॉर्च्यूनर कारमधील पाच जणांचा जागेवरच मृत्यू झाला आहे. अपघात इतका भयंकर होता की कारची अवस्था पाहून उपस्थितांच्या पायाखालील वाळू सरकली. कारचा पूर्णपणे चक्काचूर झाला होता. पोलिस घटनास्थळी पोहोचले आणि ग्रामस्थांच्या मदतीने बऱ्याच प्रयत्नांनंतर कटरने कार कापून मृतदेह बाहेर काढले. त्यानंतर सर्व मृतदेह पोस्टमॉर्टमसाठी पाठवण्यात आले. पोलिसांकडून याबाबत गुन्हा दाखल कऱण्यात आला आहे.