लखनऊच्या मडियाव केशव नगरमधून एक धक्कादायक बातमी समोर येत आहे. ओयो हॉटेलमध्ये एका मेडिकल विद्यार्थ्याचा संशयास्पद स्थितीत मृतदेह आढळला आहे. तरूण गर्लफ्रेंडसोबत हॉटेलमध्ये गेला होता. त्यानं काही गोळ्या खाल्ल्या. या गोळ्यांमुळे त्याची तब्येत बिघ़डली. काही वेळातच त्याचा मृत्यू झाला. हॉटेलमध्ये तरूणाचा संशयास्पद स्थितीत मृतदेह आढळल्यामुळे पोलिसांना याची माहिती देण्यात आली. पोलिसांनी तपासाला सुरूवात केली आहे.

पोलिसांनी दिलेल्या माहितीनुसार, फुजैल अहमद(वय वर्ष २८) असं तरूणाचे नाव आहे. त्यानं चीनमधून एमबीबीएस डिग्री पूर्ण केली होती. तो नंतर भारतात परतला. भारतात राहून तो एमसीआई परिक्षेची तयारी करत होता. मात्र, शुक्रवारी ही घटना उघडकीस आली. कुटुंबाने तरूणासोबत असलेल्या तरूणीची चौकशी करण्याची मागणी केली आहे.

तरूणीची लवकरच चौकशी केली जाईल, असं पोलिसांनी सांगितलं. फुजैलने ओयोमध्ये जाण्यापूर्वी मालकाला दोघे कपल असल्याचं सांगितलं. लवकरच लग्न होणार आहे, असंही सांगितलं. पण मेडिकल स्टूडेंट असूनही फुजैलनं अशा कोणत्या गोळ्या खाल्ल्या, ज्यामुळे त्याचा मृत्यू झाला, या गोष्टी संशयास्पद आहेत. याचा तपास पोलिसांकडून सुरू आहे.

पोलिसांना या घटनेची माहिती मिळताच त्यांनी घटनास्थळी धाव घेतली. तसेच मृतदेह ताब्यात घेऊन शवविच्छेदनासाठी रूग्णालयात पाठवले. पोस्टमॉर्टम रिपोर्ट समोर आल्यानंतर तरूणाच्या मृत्यूमागचं खरं कारण समोर येईल. सध्या पोलिसांनी ओयो हॉटेल आणि परिसरातील सीसीटीव्ही फुटेज जप्त केले आहेत. सीसीटीव्ही फुटेजच्या आधारे पोलिसांकडून तपास सुरू आहे.