कोलकाता: आज शुक्रवारी दुपारी २.१५ च्या सुमारास कोलकाताच्या पार्क सर्कस भागात बांगलादेश उप उच्चायुक्तालयाजवळ अंदाधुंद गोळीबार करण्यात आला. येथे पोलीस कर्मचाऱ्याने 10-15 राऊंड गोळीबार करून आत्महत्या केली. एसएलआर रायफलने अंदाधुंद गोळीबार करून त्याने दुचाकीस्वार महिलेला ठार केले, तर दुचाकीचालक गोळी लागल्याने जखमी झाला आहे. नंतर त्याने स्वत:वरही गोळी झाडली आहे. या गोळीबारात पायी जात असलेली एक महिलाही जखमी झाली आहे. या घटनेमुळे परिसरात खळबळ उडाली आहे.

गोळीबाराची माहिती मिळताच कोलकाता पोलिसांनी घटनास्थळ गाठून परिसराचा पंचनामा केला. मिळालेल्या माहितीनुसार, त्याने सुमारे 10-15 गोळ्या झाडल्या, त्यावेळी रस्त्यावरून जाणाऱ्या एका महिलेला गोळ्या लागून तिचा मृत्यू झाला. ही महिला दुचाकीवर जात होती त्यावेळी दुचाकी चालकालाही गोळी लागली आहे. जखमींना रुग्णालयात दाखल करण्यात आले आहे.

पोलिस लोकांकडून माहिती गोळा करत आहेत. तर मृतदेह पोस्टमॉर्टमसाठी पाठवण्यात आला आहे. या खळबळजनक घटनेनंतर परिसरातील दुकानेही बंद करण्यात आली.