केनियामध्ये मोठी दुर्घटना घडली आहे. अतिवृष्टी झाल्याने येथील एक धरण फुटले आहे. यामध्ये जवळपास ३५ व्यक्तींनी आपला जीव गमावलाय. तर अनेक व्यक्ती अद्यापही बेपत्ता आहेत. एएनआय या वृत्तसंस्थेने याबाबत माहिती दिली आहे. बचावपथक घटनास्थळी दाखल झाले असून नागरिकांना रेस्क्यू करण्याचे काम सुरू आहे.

मिळालेल्या अधिक महितीनुसार, राजधानी नैरोबीपासून 60km अंतरावर असलेल्या माई महियू गावात ही घटना घडली आहे. रात्री नागरिक झोपेत असताना धरण फुटले. त्यामुळे अनेक जण झोपेतच वाहून गेले आहेत. संपूर्ण गावात चिखल आणि गाळ साचला आहे. यामुळे बचावकार्य सुरू असून मृतांचा आकडा आणखी वाढण्याची शक्यता आहे.

केनियामध्ये धरण फुटल्याने यामध्ये संपूर्ण गाव पाण्याखाली गेलं आहे. अनेकांची घरं देखील वाहून गेली आहेत. गावात सध्या पाहिलं तर पूरसदृश्य परिस्थिती असून ठिकठिकाणी मोडलेली घरं,झाडं आणि सर्वत्र चिखल पसरल्याचं दिसत आहे. नागरिक आपल्या जवळच्या व्यक्तींना शोधण्यासाठी कासावीस झाले आहेत.

केनियामध्ये मुसळधार पाऊस झाल्याने रस्त्याचा काही भाग देखील खचला आहे. त्यामुळे बचाव पथकाला गावात प्रवेश करण्याआधी खचलेल्या रस्त्यातून वाट काढावी लागत आहे. मार्च महिन्याच्या सुरवातीपासूनच या गावामध्ये मुसळधार पावसाने हजेरी लावली आहे. पावसाचा जोर असाच कायम राहिला तर आणखी भीषण परिस्थिती निर्माण होण्याची शक्यता आहे.

महिनाभरात १०० नागरिकांचा मृत्यू

केनियामध्ये पावसाने मोठा हाहाकार माजला आहे. महिनाभरापासून सुरू असलेल्या पावसाने अनेक ठिकाणी पूर आला आहे. पुरामध्ये आतापर्यंत वेगवेगळ्या गावांतील १०० व्यक्तींचा मृत्यू झाल्याची माहिती आहे. येथे पुढचे काही दिवस आणखी मुसळधार पाऊस बरसणार असल्याचा इशारा हवामान खात्याने दिला आहे.