राजस्थानमधून धक्कादायक घटना समोर आली आहे. हुंड्यासाठी छळ प्रकरणात तपासासाठी राजस्थानला पोहोचलेल्या कर्नाटक पोलीस पथकातील तीन कर्मचारी लाच घेताना रंगेहाथ सापडले. राजस्थान पोलिसांनी बेंगळुरूच्या पोलीस उपनिरीक्षकांसहित ३ पोलीस कर्मचाऱ्यांना ४० हजारांची लाच घेताना अटक करण्यात आली आहे. या कारवाईनंतर पोलिसांच्या वर्तुळात खळबळ उडाली आहे.

बेंगळुरूच्या एचएएल पोलीस स्टेशनच्या हद्दीतील हुंड्यासाठी छळ प्रकरणाचा तपास करण्यासाठी पीएसआय अनिता, शिपाई यतीश कुमार आणि उलवप्पा हे जयपूरला पोहोचले. आरोपींनी तपासादरम्यान आरोपीला अटक करण्याऐवजी दिलासा आणि मदत करण्याच्या नावाखाली लाच मागितली.

कर्नाटक पोलीस कर्मचाऱ्यांनी दोन लाखांची लाच मागितली होती. कारवाईतून दिलासा मिळवण्यासाठी कर्नाटकाच्या पोलीस कर्मचाऱ्यांनी लाच स्वरुपात रोख रक्कम मागितली. लाच मागितल्याने पीडित व्यक्तीने राजस्थान पोलिसांकडे मदत मागितली. त्यानंतर त्याची तक्रार नोंदवण्यात आली.

तक्रार मिळाल्यानंतर राजस्थान पोलिसांनी तपासाला सुरुवात केली. त्यानंतर लाच घेणाऱ्या पोलिसांना रंगेहाथ पकडलं. ४० हजारांची रक्कम स्वीकारताना एसीबीच्या पथकाने कर्नाटकातील पोलीस कर्मचाऱ्यांना ताब्यात घेतलं.

राजस्थानच्या लाचलुचपत प्रतिबंधकाचे उपमहानिरीक्षक ओम प्रकाश यांच्या निर्देशानुसार, अतिरिक्त पोलीस अधीक्षक भूपेंद्र चौधरी यांच्या नेतृत्वाखाली ही कारवाई करण्यात आली. कर्नाटकच्या पोलीस कर्मचाऱ्यांना अटक केल्यानंतर त्यांची चौकशी सुरू करण्यात आली. एसीबी अधिकाऱ्यांच्या माहितीनुसार, तिन्ही आरोपींविरुद्ध भ्रष्टाचार प्रतिबंधक कायद्यांतर्गत गुन्हा दाखल करण्यात आला. या प्रकरणी पुढील तपास सुरू करण्यात आला आहे. या तिन्ही पोलिसांवर काय कारवाई होणार, हे अद्याप स्पष्ट झालं आहे.