जम्मूच्या अखनूरमध्ये गुरुवारी एक भीषण रस्ता अपघात झाला. जम्मू-पुच्छ महामार्गावरील अखनूर येथील तांडा वळणावरील दीडशे फूट खोल दरीत बस कोसळली. या अपघातात २१ जणांचा मृत्यू झाला आहे, तर ४० जण गंभीर जखमी आहेत. मिळालेल्या माहितीनुसार, ही बस उत्तर प्रदेशातील हाथरस येथून जम्मूला जात होती. या बसमधून सुमारे ५० ते ६० जण प्रवास करत होते

अपघात झाल्यानंतर घटनास्थळी बचाव कार्यसाठी आलेल्या पोलीस अधिकाऱ्यांनी या घटनेसंदर्भात माहिती दिली. प्रवाशांनी भरलेली बस उत्तर प्रदेशातील हाथरस येथून जम्मूतील शिव खोडी येथे जात होती. त्यावेळी बस अखनूर येथील तांडा या वळणार आली असताना खोल दरीत कोसळली. अपघातात जखमी झालेल्या प्रवाशांना अखनूर रुग्णालयात दाखल करण्यात आले आहे.

जम्मूच्या उपायुक्तांनी सांगितले की, हाथरस येथून प्रवाशांना घेऊन जाणाऱ्या बसला जम्मूच्या अखनूरमधील तांडाजवळ अपघात झाला. या घटनेनंतर बचावकार्य सुरू करण्यात आले आहे. दरम्यान अपघातानंतर घटनास्थळी गोंधळ उडाला. लोकांचा आरडाओरडा सुरू झाला होता. घटनेची माहिती पोलिसांना माहिती मिळताच एनडीआरएफ आणि एसडीआरएफचे पथकही घटनास्थळी पोहोचले.

पोलीस, नागरिक आणि एसडीआरएफ, एनडीआरएफने तातडीने बचावकार्य सुरू केले. जखमींना अखनूर येथील स्थानिक रुग्णालयात आणि जम्मूच्या शासकीय वैद्यकीय महाविद्यालयात दाखल करण्यात आले आहे.