जयपूर-दिल्ली द्रुतगती मार्गावर आज सकाळच्या सुमारास भीषण अपघात झाला. भरधाव वेगाने येणाऱ्या एका ट्रकने पोलिसांच्या वाहनाला मागून धडक दिली, यात उपनिरीक्षक पोलीस अधिकाऱ्याचा जागीच मृत्यू झाला. तर त्यांच्यासोबत असलेले इतर तिघेजण गंभीर जखमी झाले. जखमींवर जवळच्या रुग्णालयात उपचार सुरु आहेत.

मिळालेल्या माहितीनुसार, करौली जिल्ह्यातील सपोत्रा ​​पोलीस ठाण्यात तैनात असलेले उपनिरीक्षक हनुमान सहाय मीना, कॉन्स्टेबल काजड चौधरी, रामराज बैरवा आणि रामनरेश मीना हे चौघे फसवणुकीच्या एका प्रकरणाचा तपास करून मेरठहून परत येत होते.

दरम्यान जयपूर-दिल्ली द्रुतगती मार्गावर आंधी पोलीस ठाण्याच्या हद्दीतील नांगल बेला येथे सकाळी सुमारे ५:३० वाजताच्या सुमारास एका अनियंत्रित ट्रकने त्यांच्या वाहनाला धडक दिली. ही धडक इतकी जोरदार होती की पोलिसांच्या वाहनाचे मोठे नुकसान झाले.

या दुर्घटनेत उपनिरीक्षक हनुमान सहाय मीना यांचा जागीच मृत्यू झाला, तर कॉन्स्टेबल काजड चौधरी, रामराज बैरवा आणि रामनरेश मीना गंभीर जखमी झाले. सर्व जखमींना तातडीने दौसा जिल्हा रुग्णालयात दाखल करण्यात आले. या भीषण अपघातानंतर ट्रकचालकाने घटनास्थळावरुन पळ काढला. याप्रकरणी पोलीस ट्रकचालकाचा तपास करत आहेत.