Iran Explosion News:

इराणमधून धक्कादायक वृत्त हाती आलं आहे. इराणचे माजी जनरल कासिम सुलेमानी यांच्या कबरीजवळ दोन स्फोट झाल्याची घटना घडली आहे. या स्फोटात ७३ जणांचा मृत्यू झाला आहे. सुलेमानी यांच्या चौथ्या स्मृतीदिनानिमित्त शेकडो लोक कबरीजवळ जमा झाले होते. त्याचवेळी स्फोट झाल्याची घटना घडली असून या घटनेत १२० हून अधिक जण जखमी झाले आहेत. (Latest Marathi News)

दोन स्फोटाने इराण हादरलं

इराणच्या सरकारी वृत्तसंस्थेने दिलेल्या माहितीनुसार, बुधवारी करमान शहरात अल-जमान मशिदीजवळ असलेल्या इराणच्या जनरल कासिम सुलेमानी यांच्या कबरीजवळ दोन बॉम्बस्फोट झाले. या स्फोटात ७३ जणांचा मृत्यू झाला आहे. तर १७० हून अधिक जण जखमी झाले आहेत. सुलेमानी यांच्या चौथ्या स्मृतीदिनावेळीच ही घटना घडली आहे.   ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

'इरिब'च्या वृत्तानुसार, इराणमध्ये दहशतवादी हल्ला झाला आहे. एका व्हिडिओमध्ये रस्त्यावर काही मृतदेह पाहायला मिळत आहे. शेजारी असलेल्या इराकमध्ये अमेरिकेच्या ड्रोन हल्ल्यात मारले गेलेल्या जनरल सुलेमानी यांच्या स्मृतिदिनानिमित्त कबरीजवळ शेकडो लोक जमले होते.

इराणमधील वरिष्ठ नेते अयातुल्ला अली खामेनेई यांच्यानंतर सुलेमानी यांना मानणारा मोठा वर्ग होता. इराणमधील स्फोटाच्या घटनेने परिसरात सर्वत्र खळबळ उडाली आहे. काही लोक या हल्ल्यातील जखमींना मदतीसाठी प्रयत्न करताना दिसत आहेत.

कोण होते कासीम सुलेमानी?

कासीम सुलेमानी यांनी इस्लामिक रिव्होल्युशनरी गार्ड कॉर्प्स (IRGC) ची विदेशी ऑपरेशन्स शाखा असलेल्या कुड्स फोर्सचे नेतृत्व केलं. त्यांनी दोन दशकांहून अधिक काळ नेतृत्व केलं आहे. त्यांचा २०२० मध्ये अमेरिकन हवाई हल्ल्यात मृत्यू झाला होता. सुलेमानी यांच्या मृत्यूनंतर डोनाल्ड ट्रम्प यांनी सर्वात मोठं यश म्हटलं होतं.