इंदूर शहरातून एक धक्कादायक बातमी उघडकीस आली आहे. एका क्लब व्यावसायिकानं विष पिऊन आत्महत्या केली आहे. भूपेंद्र रघुवंशी असं शोभा क्लबच्या मालकाचे नाव आहे. त्यानं आत्महत्या करण्यापूर्वी चिठ्ठी लिहिली होती. त्या चिठ्ठीत त्यानं एका विवाहित महिलेचं नाव लिहिलं आहे. त्यानं त्याच्या मृत्यूसाठी विवाहित महिलेला जबाबदार धरले आहे.

मिळालेल्या माहितीनुसार, संबंधित विवाहित महिला भूपेंद्र यांना बलात्काराच्या खोट्या प्रकरणात अडकवून बदनामी करण्याची धमकी देत होती, तसेच महिनाभरापूर्वीच २३ लाख रुपये उकळले होते, अशी माहिती समोर आली आहे. अन्नपूर्णा पोलीस ठाण्याचे टीआय अजय नायर यांनी दिलेल्या माहितीनुसार, भूपेंद्र यांनी रात्री उशिरा विषप्राशन केले. सकाळी प्रकृती बिघडल्याने त्यांना रुग्णालयात दाखल करण्यात आले; मात्र उपचारादरम्यान त्यांचा मृत्यू झाला.

भूपेंद्र रघुवंशी यांचा विजयनगर भागात शोशा नावाचे क्लब आहे. त्यांचा मृत्यू झाल्यानंतर त्यांच्या कुटुंबियांचा जबाब घेण्यात आला. कुटुंबीयांच्या मते, इति तिवारी नावाची महिला त्यांना गेल्या काही दिवसांपासून सातत्याने ब्लॅकमेल करत होती. ती कधी बलात्काराचा गुन्हा दाखल करण्याची, तर कधी बदनामी करण्याची धमकी देत होती. एवढेच नव्हे, तर ती फ्लॅट आणि गाडीची मागणीसुद्धा करत होती.

तिनं आतापर्यंत भूपेंद्रकडून २३ लाख रूपये उकळले. इति तिवारी पूर्वी इंदूरमध्ये राहत होती. काही दिवसांनंतर ती नोकरीनिमित्त मुंबईला गेली. मात्र, तिथे जाऊनही तिचं ब्लॅकमेलिंग सुरूच होतं. ती दारूच्या नशेत भूपेंद्रला फोनवर शिवीगाळ करून धमक्या देत असे. या सर्व छळामुळे त्रस्त होऊन भूपेंद्रने आत्महत्या केली. या प्रकरणाची माहिती पोलिसांना देण्यात आली असून, पोलिसांकडून अधिक तपास सुरू आहे.