इंडोनेशियातील पूर्व जावामधील मदुरा बेटाजवळ रविवारी सकाळी एक मोठी दुर्घटना घडली. २५० प्रवासी आणि कर्मचारी असलेली 'केएमपी मुतियारा सेंटोसा २' (KMP Mutiara Sentosa 2) या प्रवासी बोटीला अचानक आग लागली. या घटनेत किमान पाच जणांचा मृत्यू झाला असून, ४१ जण अद्याप बेपत्ता आहेत. या घटनेची माहिती मिळताच, इंडोनेशियाच्या शोध आणि बचाव पथकांनी मोठ्या प्रमाणावर बचाव मोहीम सुरू केली आहे.

सुराबाया ते मकासार प्रवास करताना बोटीला आग

बचाव पथकाच्या अधिकाऱ्यांनी दिलेल्या माहितीनुसार, ही बोट सुराबाया येथील तंजुंग पेराक बंदरावरून सुलावेसी बेटावरील मकासार शहराकडे जात होती. प्रवासाला सुरुवात होऊन काही तास झाले होते. त्याचवेळी जहाजाच्या कॅप्टनने जहाजावर आग लागल्याची सूचना दिली. त्यानंतर काही वेळातच, या जहाजाशी असलेला रेडिओ आणि नेव्हिगेशन संपर्क तुटला. सुराबाया शोध पथक आणि मदत कार्य करणाऱ्या अधिकाऱ्यांनी सांगितलं की दुर्घटनाग्रस्त बोट सापुदी द्वीपपासून साधरण १९ मैल अंतरावर आहे.

या दुर्घटनेचा व्हिडिओ सोशल मीडियावर व्हायरल झालाय. या व्हिडिओ आणि प्रत्यदर्शींनी दिलेल्या माहितीनुसार, काही क्षणात पूर्ण बोटीला काळ्या धुरांनी वेढा मारला होता. जहाजावरील अनेक प्रवाशांनी 'लाइफ जॅकेट्स' परिधान केली होती. आगीपासून वाचण्यासाठी ते जहाजाच्या पुढच्या भागाकडे व 'ब्रिज'कडे (नियंत्रण कक्षाकडे) जमले होते.

आपला जीव वाचवण्यासाठी डझनभर प्रवाशांनी खवळलेल्या समुद्रात उड्या घेतल्या. मोठ्या प्रमाणावर मदत आणि बचाव कार्य सुरू आहे. सुराबाया येथील शोध आणि बचाव कार्यालयाचे प्रमुख नानंग सिगिट यांनी सांगितले की, तात्काळ मदत पुरवण्यासाठी जवळून जाणाऱ्या जहाजांना रवाना करण्यात आले आहे.

ते म्हणाले, "पाण्यात उडी मारलेल्या प्रवाशांना वाचवत आहेत. ''TB Hasnur 26'' (TB Hasnur 26) आणि 'ब्रिटिश मेंटॉर' (British Mentor) ही जहाजे बचाव कार्य करत आहेत.आगीच्या भक्ष्यस्थानी पडलेल्या फेरीपर्यंत चार मोठी जहाजे पोहोचली आहेत. यासह मुख्य बचाव जहाज 'एसएआर २४९ परमाडी' (SAR 249 Permadi) देखील घटनास्थळी रवाना करण्यात आले आहे."