Indian Army

भारतीय सैन्यात प्रसुती रजेसाठी यापुढे वरिष्ठ कनिष्ठ असा भेदभाव केला जाणार नसून सर्व महिला जवानांना समान रजा मिळणार आहे. सैन्यदल, वायूदल आणि हवाई दलातील जवानांना बालसंगोपन आणि मूल दत्तक घेण्यासाठी अधिकाऱ्यांइतकीच रजा मिळणार आहे, अशी माहिती संरक्षण मंत्रालयाने दिली.

संरक्षण मंत्री राजनाथ सिंह यांनी सशस्त्र दलातील महिला जवानांना मातृत्व, बालसंगोपन आणि मूल दत्तक रजेसाठी त्यांच्या अधिकाऱ्यांइतकीच रजा देण्याच्या प्रस्तावाला मंजुरी दिली आहे. संरक्षण मंत्रालयाच्या या निर्णयामुळे महिला जवानांच्या सैन्यातील कामाच्या स्थितीत सुधारणा होणार आहे. तसेच महिलांना व्यावसायिक आणि कौटुंबिक जीवनात संतुलन राखण्यास मदत होणार आहे, असे संरक्षण मंत्रालयाने म्हटले आहे.

 ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

जगातील सर्वात उंच युद्धभूमी असलेल्या सियाचीनमध्ये तैनात राहण्यापासून ते अथांग समुद्र आणि आकाशावर अधिराज्य गाजवण्यात महिला जवानही यशस्वी झाल्या आहेत. प्रत्येक क्षेत्रातील अडथळे महिलांनी पार केले आहेत, अशी प्रशंसा संरक्षण मंत्रालयाने केली आहे. २०१९ मध्ये भारतीय सैन्यात महिलांची भरती करून एक महत्त्वाचा टप्पा गाठण्यात आला होता. महिलांनी प्रत्येक क्षेत्रात पुरुषांच्या बरोबरीने काम करण्याची गरज असल्याचे संरक्षण मंत्री राजनाथ सिंह यांना नेहमीच वाटत आले आहे, असे संरक्षण मंत्रालयाने म्हटले आहे.