IMF loan to Pakistan : आंतरराष्ट्रीय नाणेनिधीने अर्थात IMF ने पाकिस्तानला एक दशलक्ष डॉलर कर्ज मंजूर केलेय. पाकिस्तानचे पंतप्रधान शहबाद शरीफ यांच्या कार्यालयाने हा दावा केला आहे. एक दक्षलक्ष डॉलरचे कर्ज पाकिस्तानला 7 अब्ज डॉलरच्या विस्तारित निधी सुविधा (EFF) अंतर्गत कर्ज मंजूर करण्यात आल्याचे समजतेय. पाकिस्तानला कोणत्याही प्रकारचे कर्ज मंजूर न करण्याची मागणी भारताने केली होती. पण आयएमएफने भारताच्या मागणीला डावलून हा निर्णय घेतला.

भारताने आयएमएफच्या बैठकीत पाकिस्तानच्या दहशतवादाला प्रोत्साहन देणाऱ्या कारवायांवर आणि कर्ज परतफेडीच्या खराब इतिहासावर जोरदार आक्षेप नोंदवला होता. पाकिस्तान गेल्या ३५ वर्षांत २८ वर्षे आयएमएफकडून कर्ज घेत आहे.पण त्यांच्याकडून कर्ज परतफेड होत नाहीच, त्याशिवाय अटींचे पालनही होत नाही, असा दावा भारताने केला होता. भारताने या कर्जाचा दहशतवादी कारवायांसाठी दुरुपयोग होण्याची भीती व्यक्त करत मतदानातून माघार घेतली होती. भारताने आयएमएफ, जागतिक बँक आणि आशियाई विकास बँकेकडील पाकिस्तानच्या कर्जाचे पुनरावलोकन करण्याची मागणीही केली.

पाकिस्तानी पंतप्रधान शहबाज शरीफ यांनी आयएमएफच्या निर्णयाचे स्वागत केले. भारताचा डाव अयशस्वी झाल्याचा दावाही पाकड्यांनी केला.पाकिस्तानचे पंतप्रधान कार्यालयाने म्हटले आहे की, भारताने आक्रमक धोरणाने लक्ष वळवण्याचा प्रयत्न केला, परंतु आयएमएफने त्यांची दिशाभूल नाकारली. शरीफ यांनी या कर्जामुळे कर सुधारणा, ऊर्जा क्षेत्र सुधारणा आणि उद्योग-उपयोगितांच्या किंमतीत समायोजनाला गती मिळेल, असे सांगितले.

आयएमएफने मार्चमध्ये या कर्जाच्या पहिल्या द्वैवार्षिक पुनरावलोकनासाठी कर्मचारी-स्तरीय करार केला होता, ज्यामध्ये कर संरचनेत सुधारणा आणि कार्बन लेव्ही यांचा समावेश आहे. या कर्जामुळे पाकिस्तानच्या आर्थिक सुधारणांऐवजी दहशतवादाला खतपाणी मिळेल, असा इशारा भारताने दिला.