भारतावर काही दिवसांपूर्वी दुहेरी चक्रीवादळाचं संकट ओढवलं होत. त्यानंतर महाराष्ट्रात अनेक जिल्ह्यांत पावसाने हजेरी लावली. मात्र भारतात तीव्र थंडी पडणार असल्याच्या अफवा पसरत होत्या. या अफवांवर भारतीय हवामान खात्याने उत्तर दिले आहे. IMD चे महासंचालक डॉ. मृत्युंजय महापात्रा यांनी सांगितले की, मागील वर्षांप्रमाणेच यंदाचा हिवाळा हा सौम्य असणार आहे.

हवामान खात्याने सांगितल्याप्रमाणे काही दिवसात थंडी पडण्यास सुरुवात होणार आहे. यावेळी दिवसाचे तापमान इतर दिवसांपेक्षा थोडे कमी असेल, तर रात्रीचे तापमान इतर दिवसांपेक्षा जास्त राहण्याची शक्यता आहे. दिल्ली, हरियाणा आणि राजस्थान सारख्या भागात रात्री तुलनेने थंड जाणवेल परंतु एकूणच, उत्तर भारतात तीव्र थंडी फारशी जाणवणार नाही.

IMD चे महासंचालक डॉ. मृत्युंजय महापात्रा म्हणाले की, "येत्या काही दिवसांत थंडीची चाहूल लागेल. तसेच ही थंडी सौम्य असणार आहे. तीव्र राहणार नाही. दरवर्षी डिसेंबर आणि जानेवारीमध्ये उत्तर भारतात सामान्यतः तीव्र थंडी पडते. या थंडीचा परिणाम संपूर्ण प्रदेशात जाणवतो, ज्यामुळे लोकांचे जीवन आणि दैनंदिन दिनचर्या विस्कळीत होतात. जम्मू आणि काश्मीर, उत्तराखंड, पंजाब, हरियाणा, दिल्ली आणि उत्तर प्रदेशसह उत्तर भारतातील अनेक भागात तापमान १० अंश सेल्सिअसपेक्षा कमी झाले आहे, ज्यामुळे थंडीची लाट निर्माण झाली आहे.

भारतात यंदाचा हिवाळा खूप कडक किंवा खूप सौम्य असणार नाही. तो मध्यम स्वरूपाचा असणार आहे. दिवसा वातावरण थोडे थंड असेल, परंतु रात्री तुलनेने वातावरण मध्यम थंड स्वरूपाचे असणार आहे . 'ला निना' कमकुवत होत असल्याने आयओडी हळूहळू सामान्य होत आहे. म्हणूनच, हवामान खात्याने लोकांना 'तीव्र हिवाळा' असल्याच्या अफवांकडे दुर्लक्ष करण्याचे आवाहन केले आहे.