हिमाचलमध्ये भरधाव कार दरीत कोसळून ६ जणांचा मृत्यू झाल्याची घटना ताजी असताना हैदराबादमध्येही भीषण अपघाताची घटना घडली. हैदराबादमध्ये १५ लाखांच्या बाईकने कारला धडक दिली. दुचाकी आणि कारच्या धडकेत एकाच कुटुंबातील तिघांसहित ५ जणांचा मृत्यू झाला. १५ लाखांच्या महागड्या दुचाकीने दिलेल्या धडकेत कारचा चक्काचूर झाला. हैदराबादच्या मेहबूबनगर पालकोडा बायपास रोडवर मध्यरात्री अपघाताचा थरार घडला.

अपघात घडल्याची माहिती मिळताच पोलिसांनी घटनास्थळी धाव घेतली. पोलिसांनी मृतदेह ताब्यात घेऊन पोस्टमार्टमसाठी रुग्णालयात पाठवले. पोलिसांनी अपघाताचा तपास सुरू केला आहे. पालकोंडा बायपास रोडवर युवकांच्या दुचाकीच्या शर्यतीदरम्यान स्पोर्ट्स बाइक आणि कारची धडक झाली. मिळालेल्या माहितीनुसार, पालकोंडा बायपास रोडवर सोमवारी रात्री १२.३० वाजता कार धिम्या गतीने वळण घेत होती. दुसरीकडे काही तरुणांची बाईकची शर्यत सुरू होती. एका स्पोर्ट्स बाइकने कारला धडक दिली. बाइकच्या धडकेत कारचा चक्काचूर झाला.

अपघातात कारमधील हैदराबादमधील एकाच कुटुंबातील तीन जणांचा जागीच मृत्यू झाला. ३० वर्षीय अर्शा बेगम, ७ वर्षीय उजेपा आणि २ वर्षीय उमरचा अपघाती मृत्यू झाला. बाइकवरील दोघांचा मृत्यू झाला. २५ वर्षीय याकूब अफजल अशी एकाची ओळख झाली आहे. दुसऱ्याची ओळख पटवण्याचं काम पोलिसांनी सुरू केलं आहे.

मध्यरात्री घडलेल्या अपघाताची माहिती मिळताच पोलिसांनी घटनास्थळी धाव घेतली. त्यांनी घटनास्थळी पोहोचून मृतदेह ताब्यात घेतले. दुर्घटनेनंतर बायपास रोडवर वाहतूक कोंडी झाली. पोलिसांनी पोहोचून वाहनधारकांची वाहतूक कोंडीतून सुटका केली.

स्थानिकांच्या माहितीनुसार, पालकोंडा बायपास रोडवर रात्रीच्या वेळी दररोज दुचाकीच्या शर्यत होतात. स्थानिकांनी अनेकदा पोलिसांना तक्रारी दिल्या आहेत. त्यानंतरही कोणतीही कारवाई करण्यात आली नाही. पोलिसांनी आधीच कारवाई केली असती, तर ५ जणांचे जीव वाचले असते. पोलिसांनी बेकायदेशीर दुचाकी शर्यतीच्या विरोधात कारवाई सुरुवात केली आहे.