पुलवामा : जम्मू काश्मीरमधून एक संतापजनक घटना उघडकीस आली. एका नराधम दीराने आपल्याच वहिनीवर बलात्कार करण्याचा प्रयत्न केला. या कृत्याला विरोध केला असता, त्याने वहिनीची गळा दाबून हत्या केली. या धक्कादायक घटनेमुळे परिसरातून संताप व्यक्त केला जात आहे. (Crime News)

याप्रकरणी पोलिसांनी ४८ तासांत तपासाची चक्रे फिरवत नराधम दीराला अटक केली आहे. जुबेर (वय २१ वर्ष) असं अटक करण्यात आलेल्या आरोपीचं नाव असून शबाना (वय २९ वर्ष) असं मृत महिलेचं नाव आहे. जम्मू काश्मीरमधील पुलवामा जिल्ह्यातील ही घटना घडली आहे.

प्राप्त माहितीनुसार, मृत महिलेचा पती हा कामानिमित्त बाहेरगावी गेला होता. त्यावेळी घरात फक्त मृत महिला आणि तिचा दीर आरोपी जुबेर हे दोघेच होते. पोलिसांनी दिलेल्या माहितीनुसार, आरोपी जुबेर याची मृत शबाना हिच्यावर वाईट नजर होती.

मंगळवारी (१० जानेवारी) घरात कुणी नसल्याची संधी साधून त्याने वहिनीसोबत जबरदस्तीने शारिरीक संबंध प्रस्तापित करण्याचा प्रयत्न केला. या गोष्टीला वहिनीने विरोध केला असता, आरोपीने गळा दाबून तिची हत्या केली. एका हिंदी वृत्तवाहिनीच्या वृत्तानुसार, हत्येनंतर आरोपीने वहिनीच्या मृतदेहावर बलात्कार केला.

दरम्यान, हे घृणास्पद कृत्य केल्यानंतर आरोपीने घरातून पळ काढला. सकाळ होऊन सुद्धा घरातून कुणीच बाहेर न आल्याने शेजारील महिलेने दार ठोठावले. मात्र, कुणी प्रतिसाद देत नसल्याने तिने खिडकीतून डोकावून बघितले असता, हा प्रकार उघडकीस आला.

याप्रकरणी मृत महिलेच्या पतीने दिलेल्या फिर्यादीवरून पुलवामा पोलिसांनी आरोपीविरोधात गुन्हा दाखल करत त्याला अटकही केली आहे. आईसमान असलेल्या वहिनीवरच दीराने जबरदस्ती करत तिची हत्या केल्याने परिसरातून संताप व्यक्त केला जात आहे.

Edited By - Satish Daud