हाँगकाँगच्या ताई पो भागात अनेक निवासी इमारतींना आग लागल्याची घटना घडलीय. या भीषण आगीत अग्निशमन दलाच्या जवानासह १३ जणांचा होरपळून मृत्यू झाला आहे. हाँगकाँगमधील वांग फुक कोर्ट नावाच्या सोसायटीमध्ये आग लागली आहे, ज्यामध्ये २००० हून अधिक फ्लॅट आहेत. मृतांचा आकडा वाढण्याची शक्यता असल्याचं वृत्त रॉयटर्सने वृत्त दिले आहे.

हाँगकाँग सरकारने या घटनेबाबत माहिती देताना सांगितले की वांग फुक कोर्टमध्ये दुपारी २:५१ वाजता आग लागली. सुरुवातीला आग कमी होती. परंतु संध्याकाळी ६:२२ वाजेपर्यंत आगीनं रौद्र रूप धारण केलं. जवळपास ७०० हून अधिक अग्निशमन दल आग विझवण्याचे काम करत आहे. पोलिसांनी जवळच्या इमारती रिकामी केल्या आहेत आणि एक हेल्पलाइन नंबरदेखील जारी केला आहे. इमारतींमध्ये अजूनही अनेक लोक अडकले आहेत आणि २८ लोक जखमी झाल्याचे वृत्त आहे.

अग्निशमन दलाचे अधिकारी चाउ विंग-यिन यांनी पत्रकार परिषदेत सांगितले की, १३ जणांपैकी ९ जणांना घटनास्थळीच मृत घोषित करण्यात आले, तर सहा जणांना गंभीर अवस्थेत रुग्णालयात दाखल करण्यात आलं होतं. मृत अग्निशमन कर्मचाऱ्याची ओळख वाई-हो अशी झालीय. अग्निशमन विभागाने सांगितले की दुपारी ३:३० च्या सुमारास त्यांचा वाई-होशी संपर्क तुटला. तो दुपारी ४ च्या सुमारास बेशुद्ध अवस्थेत आढळला होता.