जेव्हा नातं तुटतं, तेव्हा आवाज येत नाही, पण ती व्यक्ती आतून पुर्णपणे तुटते. खचून जाते. थायलंडमधील एका पुरूषासोबतही असाच प्रकार घडला. घटस्फोटामुळे अस्वस्थ झालेल्या व्यक्तीनं महिनाभर फक्त बिअर प्यायली. ना तो काही खात होता, ना पाणी पित होता. बायकोचा विरह त्याला सहन झाला नाही. व्यसन आणि मानसिक तणावामुळे त्याचा मृत्यू झाला. या दुर्देवी घटनेमुळे परिसरात खळबळ उडाली आहे.

थावीसाक नामवोंगसा (वय वर्ष ४४) असे मृत व्यक्तीचे नाव आहे. तो थायलंडच्या रायोंग प्रांतातील रहिवासी असल्याची माहिती आहे. महिनाभरापूर्वी त्यानं बायकोला काडीमोड दिला होता. मात्र, बायकोसोबत विभक्त झाल्यानंतर त्याला विरह सहन झाला नाही. त्यानं संपूर्ण महिना बिअर पिऊन घालवला. न काही खाता, न काही पिता त्यानं दिवस पुढे ढकळले.

स्थानिक माध्यमांच्या वृत्तानुसार, १६ जुलै रोजी थावीसाक यांच्या घरी रूग्णवाहिकेला बोलावण्यात आले. ते घरी बेशुद्ध अवस्थेत पडले होते. त्यांना झटके आणि संपूर्ण अंग थरथरत होते. त्यांचे हात - पाय काळेनिळे पडले होते. जे रक्ताभिसरण बंद झाल्याचे लक्षण होते. डॉक्टरांनी त्यांना तपासून मृत घोषित केले. पोलिसांनी त्यांच्या खोलीची तपासणी केली असता, त्यांच्या घरात शेकडो रिकाम्या बिअरच्या बाटल्या आढळल्या.

थावीसाकच्या १६ वर्षीय मुलानं सांगितले की, वडिलांनी एक महिन्यांपासून काहीही खाल्ले नव्हते. फक्त बिअर पित होते. मुलानं अनेकवेळा त्यांना खायला देण्याचा प्रयत्न केला. पण त्यांनी खाल्लं नाही. त्यांना कोणताही आजार नव्हता, पण आईपासून वेगळं झाल्यापासून त्यांना या गोष्टीचा त्रास झाला. व्यसन आणि मानसिक तणावामुळे त्यांचा दुर्देवी मृत्यू झाला. या घटनेमुळे परिसरात खळबळ उडाली आहे.